Leit kyrpad ki nongialam ka MCCEU ia u Conrad ban siew noh ka pisa nakabynta ki nongtrei karkhana pynmih dewbilat

Shillong 06 Rymphang: Ki nongialam ka Mawmluh Cherra Cements Employees’ Union (MCCEU) ha ka sngi palei ka 06 tarik Rymphang 2025, ki la leit ban kyrpad ia u Myntri Rangbah ka Jylla u Conrad K Sangma, ban siew noh ia ka pisa katkum ka skhim ba kyrpang na ka bynta ki nongtrei  kane ka karkhana pynmih dewbilat ha ki ar bynta ym ban ai lai bynta ka jingsiew. 

Ha ka jingiakren bad ki lad pathai khubor hadien ba la dep ïakynduh bad u Myntri Rangbah ka Jylla, nakaliang u president ka MCCEU u bah Pynskhem, ba ka sorkar ha kaba nyngkong ka la tyrwa ban pyllait noh ïa ka jingïarap ha ki lai tylli ki jingsiew na ka bynta lai snem bad Kane ka jingpynbna ka sorkar kan buh jingeh ia ki.

Shuh shuh U bah Lyngdoh u la pynshai, ba la khmih lynti ba ki nongtrei kin ioh kumba 14 lak tyngka na katei ka skhim hynrei u la pynpaw ia ka jingsngewkhia ba lada ioh tang kumba 4 lak tyngka ha ka shisnem kan wanrah ia ka jingeh ia ki ban pyndap pynbiang ia ka iing ka sem.

U la kyntu ia ka sorkar ba ka dei ban pyllait 40% na ka pisa baroh ha ka sien kaba nyngkong, bad ia kaba sah 60% yn pyllait ha ujuh u snem.

U bah Pynskhem Lyngdoh u la kdew ruh, ba nakaliang u Myntri Rangbah ka jylla, um shym la ai kano kano ka jingkular ia ki, hynrei u la ong pat, ba kin sa peit bniah haba ia dei bad kane ka jingkyrpad ka jong ki.

Na la Liang u vice president ka MCCEU u Bah SK Dkhar haba kren sha ki lad pathai khubor u la iathuh, ba na ka Liang ka jong ki, ki la pynsngew sha u Myntri Rangbah ka Jylla ban pyntreikam ïa ki projek hapoh ka MCCL ban kyrshan ïa ki nongtrei kiba dang sah bun snem ka jingshakri. 

U la kubur ïa ka rai jong ka sorkar ban khang noh ïa ka MCCL haduh ka 31 tarik u nohprah, 2024, hynrei u la ban jur ïa ka sorkar ban pyndonkam ia ki kor  ki bor kiba la don lypa ha ka jaka ban iehnoh ïa ki khlem pyndonkam.

U bah Dkhar u la ai jingmut ban buh ia ka Industrial Training Institute (ITI) lane ka jaka ai jinghikai kam hapoh ka jaka jong ka MCCL, da kaba kdew ba ki jingtei ki la don lypa.

Nalor kata, u Dkhar u la kdew ba ka Mawmluh ka la nang kynjah naduh ba ka MCCL ka la sangeh noh ïa ki jingtreikam. “Ka jaka ka la kylla long ka jaka kaba ma, ha kaba duna bha ki nongleit nongwan ki kali, kaba pynlong ia ka ban kham duna ka jingshngain haba ia nujor bad ka por ba ka MCCL ka dang treikam,” u la bynrap.