Shillong, Lber 18: Ka seng Federation of Khasi Jaintia Jaintia and Garo People (FKJGP) mynta ka sngi baar ka 18 Tarik u Lber 2025, kala leit ban iakynduh iaka Myntri badei peit ia tnat ka rep ka riang ka Kong Ampareen Lyngdoh, ban iakren halor ka jingeh jong ki nongrep, ha kaba iadei bad ka Agricultural Loan na ki bank.
” Ha ka jingiakren bad ki nongthoh khubor ka seng ka la pynpaw ka jingsngewdiaw kaba khraw halor ka jingud ki nongrep na ki thain Mawkynrew bad Mawryngkneng Block ha kaba iadei bad ka ram rep kaba ki la shim na ka bank bapher bapher.
Shuh shuh la ong,ba Kum ba long mynta, ka mariang ka la tyrkhong shaba palat bad ka jingthung ba ki la noh ki la iap lut namar ym don slap kat haduh mynta bad Kane ka sa ktah shibun ia ka jingpynlut jong ki, namar haba la duh ki jingthung kin nym ioh die shuh, bad haba kim ioh die, kim lah shuh ban siew ram kaba ki shim na ki bank” la ong ki nongialam ka FKJGP.
” Ha ka ba iadei pat bad kane na ka liang ki nongialam ka seng FKJGP Mawkynrew bad Mawryngkneng Block, ki la kyntu iaka Sorkar lyngba ka Myntri Sorkar ka kong Ampareen, ban thaw ki lad ki lynti ban map iaka ram ki nongrep khnang ba ki nongrep kin nym ia kynduh jingeh hadien habud”.
Nalor kane ki nongialam ka FKJGP kila ai jingmut ruh iaka Myntri ka tnat ka koit ka khiah ban shimkhia halor ka jingbym iohshuh ia ki Dawai Sboh (Ureas, DAP, Dawaikhleh had kiwei) kiba baroh shi katta ki ioh ban thied ha ka subsidy, ka jingbym lah na ka liang ka Sorkar ban pynbiang ia ki symbai jingthung lyngba ka tnat ka rep ka riang. Ka jingpynslem ka Sorkar ban jarap pisa sha ki Producer Group (PG) wat hadien ba la register la palat shi snem, ban sam sha ki Block da u symbai babha 1st class ym da u 3rd Class, ban pynbun ka pump synreit dawai (spray Pump) Subsidy sha manla ki Block, ban ai la ki jingtip kiba paka shaphang ki scheme bapher bapher khnang ba ki nongrep kin ioh ia ka jingmyntoi, ban pynkloi la ki lad jingiarap sha ki Nongrep ha man la ki Block ha kaba iadei bad ka jingshah lynshop ha ka bor jong ka Mariang, ban shna ia ka surok sha ki lyngkha jong ki Nongrep khnang ba ki Nongrep kin kham myntoi, ban pynioh ia ka Ropeway sha ki thain Riwar bad sha ki shnong ba long riat ban pynsuk ia ki ha ka kit ka bah ia ki mar rep, ban pyntreikam noh mardor ia ka MSP ha ka Jylla khnang ban iarap ia ki nongrep bad ban pynbun ia ki symbai jhur kynthup u Mili, Kubi, Phulkubi, kba, phan, sohsaw, sohmynken, sying, bad kiwei kiwei sha man la ki block.
Kumta ka seng ka la kyntu kala kyntu iaka Myntri, ban thaw ki lad ki lynti ban map noh iaka ram jong ki nongrep kiba shim na ki Bank bapher bapher.
Phi don ban ong eiei?