Leit khroh ia ki samla Garo, ba kin rung kam pulit

Shillong, 18 Iaiong:
Ka jing ia knieh ban rung kam pulit, ka long kaba la jubor palat ha Shillong, ha kine ki sngi, katba sha Garo Hills, ki pulit ki da leit wad khrang ban khroh ia ki samla, ba kin pyniasoh noh ialade sha ka kam pulit.
Ki pulit ha kine ki sngi, ki la leit rung sha shnong rit jong ka Garo Hills, ha kaba ki la leit ban khroh ki samla Garo kiba la nang la stad, ba kin rung sha ki kam pulit da kaba pynlong ia ka jing ai jinghikai shaphang kane. Lah ban pynkyn maw, ba ka tnat pulit, ka la dep ban pynmih dang shen, ia ka jing pynbna, na ka bynta ki 2500 tylli ki kam pulit kiba lait ha ki kyrdan bapher bapher kum ki SI (UB bad AB), Constables (UB, MPRO), AB bad BNCs, Drivers, Followers bad kiwei kiwei de.
Ka kyrwoh pulit, ka iathuh ba la shim ia kane ka kabu, hadien ba ki la iohi ba bun na ki samla Garo khamtam kum na ka shnong Mandalgre, Bandigre, Amphangre, Adokgre bad kiwei pat ki jaka ba dang sahdien kiba don ha kjat lum jong ka Durama, kim don jingtip eiei shaphang kane ka jingthung kam pulit, namar ym shym don mano mano ba pyntip ia ki. Ki la ong ruh ba dei na kane ka daw ba bun na ki samla ki kylla long langknia ha ki kynhun lehnoh kum ka GNLA bad ASAK.
Bun na ki samla Garo kila ia shim bynta ha kane ka prokram ba la wanrah da ki pulit la iathuh ruh ba kine ki samla kyndong ki da shitrhem ban shim bynta ha kane ka prokram ba kumno kin ioh ban rung ha ki kam pulit.
Kane ka prokram ai jing hikai ka long kum shi bynta ban iarap ia ki samla kyndong na Garo ba kin nym don ka jingsngewthuh bakla shaphang ka jingthung kam pulit bad ban pynsngewthuh ruh ia ki shaphang ka Transparent Recruitment Process (TRP) ba la mynjur da ka sorkar bad ba la pyntreikam ruh ia kane hapoh Police Department.
Ka kyrwoh khubor, ka ong shuh shuh, ba U Sohan D Shira bad ka kynhun lehnoh jong u, ki pyrshang ban khring ia ki samla da kaba ai ei ia ki mobile phone bad ruh lyngba ki pisa. Bun na ki paidbah shnong kiba pyniasoh ialade sha ki kynhun lehnoh ka dei ka jingshah pynbiej jong ki lyngba ki pisa bad ki mobile. Shuh shuh kane ka prokram kan iarap ia kine ki samla ban lait na ki jingshah pynbiej ha ka kynhun GNLA lane kino kino ki kynhun kieng atiar, bad kan pynshlur ruh ia ki ban rung sha ki kam pulit, iathuh ki tyllong khubor.