Leit kai U Richard Branson, sha ka haw haw, kaba sha lyndet jong ka pyrthei

U Sir Richard Branson, ula pynbna ia ka juk thymmai jong ka jingleit kai sha suin bad katei ka dei hadien, ba hynnin ka sngi, ula leit her dalade hi sha ka haw haw, ha ka jingleit kaba shimpor shi kynta.

U Branson, uba don 70 snem ka rta, ula long uba nyngkong eh, ban her sha ka haw haw, wat ha shwa jong U Elon Musk, ha kaba ula leit bad wan phai biang, lyngba ka liengsuin jongu, ka Virgin Galactic.

Utei u heh spah, u iathuh ba katei ka jingleit, ka dei kaba sah kynmaw ha ka jingim jongu bad kaba um pat shym la mutdur ba kan urlong. “Ka long ka bym lah shemphang satia ban batai ha ki kyntien, ia kaei kaba phi iohi, ia ka pyrthei, haba phi peit na suin bad ngam lah ap slem, ban iohi, ba ma phi ruh, phin poi lem shatei” bad u ai khublei ruh ia ka kynhun jongu, kaba la trei shitom 17snem kynthih, ban pynurlong ia kane ka jingthmu.

U Richard bad ka kynhun jongu, ki poi sha ka jingjngai kaba 53mer shatei sha haw haw.

U Sir Richard, ula ia kynduh ruh ia ka jaka, ha kaba ka met jongu, kam don jingkhia shuh, kaba long da ki bun minit, ha shwa ba ka liengsuin kan wan phai sha ka pyrthei. U Richard, u leit sha katei ka jingshong liengsuin, ha ryngkat bad 3ngut ki dkhot jong ka Virgin bad sa 2ngut ki nongniah liengsuin, ba kynthup ruh ia heh shipai barim ka British, U Dave Mackay. U Branson, u leit sha ka haw haw, ha ka liengsuin, kaba la tip kyrteng ka Virgin Space Ship Unity, kaba jrong 62 phut bad katei ka liengsuin, ka sdien hapdeng jong ki ar tylli ki thapniang jong ka liengsuin kmie, kaba la tip kum ka Mother Ship Eve. Katei ka liengsuin, la iathuh ba ka her stet haduh 50,000 phut shatei sha ka haw haw bad ha katei ka jingher, ka liengsuin ka law noh ialade, na ka liengsuin bad ka sa leit sha katei ka jaka kaba ka dei ban iaid sha lyngba ka pyrthei.

Ka jingstet ka liengsuin ban iaid ka long 2,300 mer ha ka shi kynta bad kaba long lai shah shiteng ia ka jingstet jong ka jingher jong ka sur.

Ka don ka jing iakren halor ka haw haw, kaba don sha lyndet jong ka pyrthei bad U Jeff Bezoz, uba dei u trai jong ka Amazon, u shim, ba ka don 62 mer sha lyndet jong ka pyrthei.