Leit jurip u MR ïa ka iing ba pluh, u Singhania ha Thana Road

Shillong:U Myntri Rangbah ka Jylla u Conrad K Sangma ha ka sngi Nyngkong, ula leit jurip ïa ka Building jong u Amit Singhania ha Thana Road, Police Bazar, Shillong, kaba la shah bam duh khait ha ka ding kaba pluh myn ha ka sngi Saitjaiñ.

Kane ka building ka don bun ki godown bad ka Ïingsah jong u Singhania, ka la shah pynjulor ha kane ka ding.
Ki kali pynlip ding kat haduh mynta ki dang ïakhun ban pynlip ïa ka ding. Ka jingïakhun ïa ka ding ka la jan kot haduh 40 kynta hynrei watla katta ka ding kam pat lip lut.

Kane ka jingjia kala jia ruh tang arsngi hadien ka jingleh mock drill jong ka Sorkar Jylla ban tem ïa ki jinglynshop ki bor jong ka mariang.
U Myntri Rangbah ka Jylla ula shong bishar kam halor kane ka jingjia baroh bad u Chief Secretary, u Director General of Police lem bad ki Heh Ophisar ka Jylla.

U Myntri Rangbah ula ïakynduh ruh ïa ka Longïing u Singhania bad pynpaw ïa ka jingsngewkhia halor kane ka jingjia haba ai jingithuh ruh ïa ka jingtrei borbah jong ki shipai, ki Pulit, ki pulit pynlip ding bad ki kynhun bapher bapher kiba ïa don bynta ha kaban tem ïa kane ka jingjia.