Leit jurip lum jingtep, ba don kiba mane ksuid

Shillong, 18 Jylliew:
Ki bor pyniaid District, ki la pynlong ia ka jingleit jurip ia ki jaka tep briew mynta ka sngi, hadien ba ka la don ka jingteh kyndon 144 Cr PC jong U Deputy Commissioner jong ka East Khasi Hills bad halor ka jingmih khubor, ba don kiba mane ksuid ha ki lum jingtep.
Ki bor pyniaid District, ki la leit sha ki lum jingtep ha Lawmali, Mawroh, ha kaba la ialam da U bah DM Wahlang Additional District Magistrate, ba peit ia ka shongsuk shongsain ha ka nongbah.
La lap ba ha ki jaka tep briew, ki don ki jingthoh ba har rukom, ki jingdro ba I sait met bad nangta, ba ki don ki bitor kyiad bad kiba thang ding ruh ia ki dieng phna, ha kitei ki jaka tep briew.
“Ki don kitei ki jaka tep briew kiba khlem don jingker satia bad kumta ka jingia rung ia mih, ka long kaba laitluid shibun eh bad kumta kam long kaba suk, ia ki bor pulit ba kin ioh kem ia kito kiba leit leh ia kitei ki kam runar ha ki jaka tep briew” ong uwei u heh Sorkar.
La iathuh ba naduh mynta, kan don ka jingleit khynra bad talasi kaba kyndit sha kitei ki jaka tep briew bad ba yn pynshitom ia kito kiba ia khalai ne ia dih buaid, ha kitei ki lum jingtep” ong shuh shuh u heh Sorkar. La maham ruh ba ia kito kiba ia leh ieid leh thoin, ba kim dei ban leit ia kynduh sha ki jaka tep briew.