Leit jurip ki Myntri ia ka rukom pyntrei ia ki skhim pynroi ka sorkar pdeng ha ki shnong ha Ri Bhoi

Nongpoh: Ar-ngut ki Myntri ka sorkar pdeng kiba kynthup ia u Kapil Moreshwar Patil, Minister of state for Pachayati Raj bad u Prahlad Singh Patel, Union Minister of State for Food Processing Industries bad ka Jal Shakti, mynta ka sngi ki la leit ban jurip ia ka jingpyntrei ia ki katto katne ki skim ka sorkar pdeng kaba la pyntrei ha ki shnong kiba don ha Ri Bhoi.

U Kapil Moresshwar Patil, u la leit ban jurip ia ka shnong Lum Umpih ha Umsning bad ia ka shnong Pahammawlein, ha katei ka jingleit jurip, utei u Myntri ka sorkar pdeng, u la leit ban jurip ia ka jingpyntrei ia ki skhim kum MGNREG, PMAYG, VLDP, RGSA, NRLM bad nalorkata u la kynduh ruh ia ki nongkitkam SHG, ki Rangbah Shnong bad ki dkhot ka VEC.

Katba u Pralad Singh Patel, u la leit jurip sha ka shnong Borgang hapoh ka Umling C&RD Block, na ka bynta ban leit jurip halor ka jingpyntreikam ia ka skhim Jal Jeevan Mission, kaba dei kawei na ki skhim sha ki paidbah bad ka ban ai jingmyntoi ia ki shnong ki thaw ha kaba ia dei bad ka umbam umdih, ha katei ka sngi utei u Myntri ka sorkar pdeng u la iohlad ban kylli na ki ki ophisar ka tnat PHE bad na ki nongialam shnong halor ka jingpyntrei ia katei ka kam.

Kitei ki Myntri sorkar pdeng, ki la pynpaw ba ki kmen eh ba ki la ioh ia ka lad ba kin leit jurip dalade sha kitei ki shnong bad khamtam eh haba ki la iohlad ban iakren bad ki riew paidbah ne nongialam shnong ha kiba kum kitei ki shnong.

Ha katei ka jingleit jurip, ki la lap ba don ki khep kaba ka rukom pyntrei kam da biang eh bad kaei kaba ka sorkar pdeng ka mut bad thmu, namarkata kitei ki Myntri ki la kyntu ia ki ophisar sorkar ha ki tnat treikam bapher bapher, ba ki dei ban iatreilang bad ki bor shnong bad ha kajuh ruh ka por ba ki dei ban khmieh bniah halor ka rukom ban pyntrei ia ki skim kiba ai jingmyntoi ia ki paidbah, khnang ba kan long ka jingmyntoi ia ki paidbah ha ki shnong bapher bapher.

Ha katei ka sngi kaba la wan jurip da kitei ki Myntri ka sorkar pdeng, la synran da ka Kong RM Kurbah, Deputy Commissioner ka Ri Bhoi District kumjuh u Block Development Officer ka Umsning C&RD Block bad kiwei kiwei ki heh ophisar.