Leit jurip ki MLA na Ri lum Garo ia 3 tylli ki shnong, ba ki paidbah ki pyrshah, ban shah kynthup sha Assam

Nongpoh:Arngut ki MLA na Ri lum Garo, kiba kynthup ia u Zenith Sangma ha ryngkat u Winnerson D. Sang ma, kiba dei ruh ki MLA kiba don ha ka liang pyrshah, hynnin ka sngi ki la hiar sha ki katto katne tylli ki shnong khappud kiba hap hapoh ka Raid Marwet ha Ri Bhoi, kata na ka bynta ban tip ia ka jingshisha bad ruh ban sngap ia ka sur u paidbah kiba shong ba sah ha katei ka thain, halor ka jingpyrshah bad ka jingbymhun jong ki ha kane ka jingiapynbeit pud hapdeng ka sorkar Meghalaya bad Assam.

Ha katei ka sngi, kaba kitei ki MLA kiba don ha ka liang pyrshah hapoh ka sorkar jylla, ki la ioh ban leit jurip ia lai tylli ki shnong, kaba ki paidbah ki pyrshah eh halor kane ka jingpynbeit pud bad kita ki kynthup ia ka shnong Maikhuli, Barapathar bad Iongkhuli, namar ki paidbah kiba sah ha kitei ki shnong, ki sngew ba kiba bun ki jaka na Meghalaya ki la shah pynhap noh sha Assam, hadien kane ka jingpynbeit pud hapdeng ki ar jylla bad nalorkata, ki paidbah kiba sah ha kitei ki shnong, ki sngew pyrshah eh ia ka ‘Give and Take Policy’ ne ka iashim ia ai ia u pud u sam hapdeng ka Meghalaya bad Assam.

Lyngba katei ka sngi, kitei ki MLA ha ka liang pyrshah, ki la ioh ruh ban pynlong jingialang ha Maikhuli bad lyngba katei ka jingialang, ki paidbah na ki shnong jong katei ka thain, ki la ioh ban pynsngew sha ki halor shibun ki jingeh kaba ki la mad haba ki sah ha khappud bad khamtam eh halor ka jingshah kynthup bun ki jaka sha Assam, ha kane ka jingpynbeit pud ba thymmai bad kaba la pynlong ruh ia ki paidbah jong katei ka thain ba kin pyrshah eh.
U Zenith Sangma, haba u kren sha ki lad pathai khubor, u la pynpaw ia ka jingsngewkhia kaba jur eh, haba u iohsngew na ki riew paidbah kiba la pynpaw ba bun na ki jaka hapoh katei ka thain, ki la shah kynthup noh sha ka Assam, ha kaba bun na ki jaka jong ka Meghalaya ki la shah kynthup noh sha Assam hadien ka jingiapynbeit pud.

U la pynpaw ruh ia ka jingsngewlyngoh, ba kumno ki heh ka sorkar Meghalaya, ki shu hun ban iasoi iasain ne iamynjur ban pynbeit ia u pud u sam ha ki shnong kiba don ha katei ka thain, namar ki khlem da kynjoh ktien lane wad jingtip na ki paidbah kiba shong ba sah ha kitei ki shnong, ha kaba ka jingshisha hi ka long ba ki paidbah kiba sah ha kitei ki shnong, kim kwah ba ki jaka jong ki ba kin shah kynthup sha Assam, namar ba ki la heh la san ha Meghalaya bad naduh ki por ba mynshwa eh.