Leit jurip ki heh ka HFU sha Mukroh, Barato

Shillong:Ka seng jong ki nongrep, kaba la tip paitbah ka Hill Farmers Union (HFU) ha ka jingialam khmat jong u bah Com mander Shangpliang, kum u president bad u bah Alfonse birth kum u Secretary ki la wan hiar sha ka shnong Borato bad ha ka shnong Mukroh ban wan pynshai ha kaba iadei bad ka rep ka riang.

Ka jingthmu jong ka seng HFU ban wan iuh kjat ha kine ki 2 shnong, ka long ban wad jingtip ia ki nongrep ba haduh katno ki nongrep ki ioh ia ki jingmyntoi, hato ki ioh ne em ka jingiarap na ka sorkar bad ki ioh ne em ka jinglam lynti ia ki.
Na ka liang jong ki nongrep, ki la pynpaw ba kim shem la ioh ka jingiarap na ka sorkar ha kaba iadei ban pynkiew ia ki mar rep. Ki mar rep kiba ki ju rep ha kine ki shnong ki kynthup ia u synsar,u shynrai, u sying, u sohphan u khaw bad kiwei kiwei de ki mar rep.

Shuh shuh ki la pynpaw ruh ba ka daw jong ka jing duna ka jingrep, ka dei ka jingbym biang bha ruh ka um.
Kumba ngi tip ba ka Jylla, ka dei kaba im bun ki nongrep, ki nongrep kim da khmih lynti than ia ka kam sorkar ki leh beit ia ka kam rep namar ka dei ka kam lajong, hynrei ki sngewthuh pat ba kumno kin rep.
Hapoh Barato border ka dei ruh ka shnong ba shah ban beiñ ha ka sorkar bad ha ki nongmihkhmat, namar ym don ba ialam ia ki.

Namar ki nongshong shnong ha kine kim ithuh ia ka Agriculture department ki ophis ka tnad jong ka sorkar ha kaba iadei bad ka rep. Kumta ki donkam mynta ia ki iew, ka kit ka bah, u symbai bad ki donkam ruh ka jingiarap, na ka sorkar ban pynpoi um ha ki jaka rep.

U bah Commander kum u President ha kane ka sngi u la pynshai sha ki paitbah jong kine ki ar shnong ban ong ba ka Hill Farmer Union, ka dei ka seng jong ki nongrep bad ka dei ka seng ban peit beit tang ia ki jingeh jong ki nongrep, ha ka jingbym biang ia ki symbai, ka jing bam khñiang ia ki jingthung jingtep, ka jingpynjulor jong ka mariang bad kiwei kiwei de ki jingeh.

Ki nongrep ki dei ban don la ki jong ki jong ki unit, ha man la ki shnong ki thaw khnang ba yn lah ban ialeh ia ki jingeh, la bynrap u bah Commander.

U bah Commander, u la ong ruh ba ka kamram bad kaba kongsan eh jong ka seng HFU ka long ban peit ban khmih ia ki jingeh jong ki nongrep ha kiba bun ki liang, hynrei lada don ia ka seng kum ki nongrep ka pynsuk bad yn lah ban ialeh ia ki jingeh ha ka kam rep.