Nongstoiñ: Ka Seng Western Youth Federation (WYF) Sengkmie hapoh ka jingialam jong u bah Mawkordor Kharsyiemlieh, ka la pynlong ia ka jingleit jurip ia ka Nonglang PHC.
Hadien bala dep ban jurip ia katei ka PHC ki dkhot jong ka Seng WYF, ki la leit ruh ban iakynduh ia u Doctor ba dei peit ia katei ka PHC u Dr. D. Hinge bad ki la ai ruh ia ka jingthoh ha kaba iadei bad ka jingdawa ban kyntiew kyrdan noh ia katei ka PHC sha ka CHC.
Na ka liang jong u Doctor Hinge ha katei ka jingiakynduh ia ki dkhot jong ka Seng u la pyntip sha ki ba katei ka PHC haduh mynta ka long kaba bit kaba biang na ka bynta ban ai jingshakri ia ki paidbah katei ka thaiñ khamtam ban ai ia ka jingsumar bad ha kaba iadei bad ka jingdon jong ki dawai ruh katei ka PHC ka biang lait noh tang ha ki khep bym poi dawai.
Shuh shuh u Doctor u la ong ruh ba ka jingduna jong katei ka PHC kam dei ha kano kano ka bynta, hynrei ka jingduna ka long ha kaba iadei bad ka jingdon jong ki nongtrei kum ki nurse bad ki grade IV, katba ha kaba iadei bad ka jingdawa kyntiew kyrdan sha ka CHC u tei u Doctor u la ong ba na ka liang jong u ha ki por ba la leit u la dep ban thoh sha ki bor kiba halor.
Haba iakren sha ki nongthoh khubor hadien ba ki la dep ban iakynduh ia u Doctor, u bah Mawkordor Kharsyiemlieh u la ong ba na ka liang jong ka Seng ka dawa na ki bor ba dei peit ba kin pynbiang nongtrei ha katei ka PHC, khnang ba ka jingai jingshakri ia ki paidbah kan nym dkoh bad u ong ruh ba ka Seng ka dawa ruh na ka sorkar ba kan kyntiew kyrdan noh ia katei ka PHC sha ka CHC, namar ba katei ka thaiñ ka la donkam, namar ba kadei ka thaiñ ka la la iar bha bad ruh kaba la jngai ban poi sha Nongstoiñ.
Phi don ban ong eiei?