Shillong: Ka Hill Farmers Union hapoh ka jingialam u President jong ka u bah Commander Shangpliang ryngkat u sordar shnong ki la leit jurip ia ka thaiñ Lyngkien, Tyrsad namar ka jingshah pynjulor ki jingthung bad ki mar-rep ha ka bor mariang. Ki la ioh jingtip ba ki don haduh 14 tylli ki shnong kiba la shah ktah ha katei ka jingjia. Katei ka seng ka la leit ia kynduh ia u BDO Mawphlang ban kyrpad ban pynsted ia ka jingiarap sha ki lanot nongrep. Shen katei ka seng ka la ong ruh ba kan leit ia kynduh ia u myntri rangbah ka jylla u Conrad K Sangma ban ia kren ia katei ka kam.
