Shillong, 22 Lber:
U Myntri ka Tnat pohing U Shri Rajnath Singh u la leit ban jngoh ia ka Headquarter Directorate jong ka Assam Rifles kaba don ha Laitkor na ka bynta ka jingrakhe ba 181 jong ka, ka ba la long ar sngi lynter naduh ka 21-22 tarik u lber. Ha kane ka jingwan jngoh ba ar sngi jong u ia ka Assam Rifles la pdiang burom da u Lt Gen Harminder Jit Singh Sachdev, PVSM, AVSM, SM, ADC, uba dei u Director General Assam Rifles.
U Rajnath u la leit ban kynmaw burom ruh ia kito ki shipai ba la khlad noh ha ki thma bad u la pynher ruh ia la lama ka Ri India kaba jrong 100 phut ha Laitkor Garrison kaba dei ruh ka ba jrong duh ha kane ka nongbah.
U Myntri u la kren sha ki ophisar rangbah,ki ophisar khynnah bad kiwei pat ki nongtrei jong ka Directorate General Assam Rifles hapoh Rising Sun Sports Complex bad kumjuh ruh sha ki hajar ngut ki shipai na kylleng ka jylla North East kiba la lah ban iohsngew ia kane ka jingkren lyngba ki T.V .Ha kane ka jingkren u la ai ka jingiaroh kyrpang ia ka Assam Rifles kaba la lah ban pynlong ia kane ka jing rakhe kaba jop bad ba iphuh iphieng. U la pynpaw ruh ka jingiaroh kaba khraw na ka bynta ka jingitynnat jong ka jingbuh ia ki syntiew sah kynmaw ha ki mawjingtep, kaba don hapoh War Memorial.
U Rajnath Singh u la ai ka jingiaroh kyrpang ia ka Assam Rifles na ka bynta ka jinglah jong ka ha baroh ki liang bad ia ka jinglah jong ka ban sei ki shipai kiba aiti bad ieid ia la ka Ri khamtam ha ki jaka kiba eh bad shitom jong ka Jylla North East. Kum ka jingai mynsiem u la ai ki kyntien shlur sha ki da kaba ong ba kin nang iai bteng ban leh ki kam babha na ka bynta ban pynneh ia ka jingsuk ha ka jylla North East. U la pynpaw ruh ba ka jingwanrah shuh shuh ia ka ka kam Havildar kumba 2500tylli kan sa weng noh ia ka jingthut ia ki rukom trei ha ki kyrdan kiba shapoh.
Phi don ban ong eiei?