Leit jngoh u Myntri ia ka 108

Shillong,1 Naiwieng:
U Myntri ka koit ka khiah ka jylla u Bah AL Hek mynta ka sngi u la leit jngoh ia ka ophis ka GVK EMRI, bad kane ka jingleit jngoh jong u ka long ruh shi bynta kum ka jingleit jurip ia ka jinglong jingman katei ka jaka ai jingiarap kyrkieh naduh ba la plie ia ka . Ha katei ka jingleit jurip u Myntri u la ia phylliew jingmut ruh bad ki nongpyniaid ka GVK kumno ban lah ban kham pynsted shuh shuh ia ki lad jingiarap ha ka por ba ki paidbah ki donkam jingiarap kyrkieh. Ha katei ka jingleit jngoh jong u u la pyllait ruh ia ka kot EM Care magazine, jong u bnai Risaw, bad u la ithuh bad ai jingiaroh ruh ia ka khusnam –Saviour Award ba katei ka tnad ka la ioh pdiang lai bnai mynshuwa. U la ai ruh ka jingiaroh ia ka kynhun ka 108 kiba la lah ban ai ka jingshakri ia u paidbah bad u la kyntu ba kin nang kham trei khambha ha ki por ban sa wan.