Leit jngoh U Dr Kalam, ia ka Don Bosco Museum

Shillong, 25 Jylliew:
Ki nong wan jngoh kai ia ka Don Bosco Museum, Mawlai ha ka sngi Ba-ar 25th tarik June, ki la dap da ka jingkmen ban iakynduh mar-khmat ia u President barim ka India, u Dr. A. P. J. Abdul Kalam haba u la leit ban jngoh kai ia ka Museum ha katei ka sngi. La synran ia u President barim ha kane ka por jngoh kai da u Director ka Museum, U Rev Fr. Joseph Puthenpurackal SDB. La don ryngkat ruh u Rev Fr. V. M. Thomas SDB, u provincial jong ka Salesian Province Guwa hati bad u Rev Fr. Jose Vettathe SDB, u Rector ka Sacred Heart Theological College, Mawlai.
Namar ka daw jong ka jingduna ka por, u President barim u la jngoh kai tang ia ki katto katne ki gallery ha ka Museum kaba kynthup ia ka neigbourhood gallery, art gallery, costume gallery, agriculture gallery bad u la iaid kai ruh ha Sky-Walk ban peit ia ka bynta jong ka sor Shillong. Ha ki-por ki-por, u President barim ka ri, u la sangeh ban kren bad ki nong wan jngoh ia ka Musuem, khamtam lei bad ki khynnah skul, kiba la iadon lang ha kata ka por ha Museum.
U President barim u la thoh ruh ha ka ‘Visitor Book’ jong ka Museum ba u dap da ka jingkmen ban jngoh kai ia ka Don Bosco Musuem. ‘Ka Museum ka la pyni ia ngi ia ki kolshor bapher bapher jong ka North East,’ la thoh u Dr. Kalam ha ka visitor book. U Dr. Kalam ruh u la ai ka jingkhublei ba kyrpang ia u Director ka Museum bad ia ki nongtrei ka Musuem kiba la trei shitrhem ban pynim ia ka kolshor jong ka North East. U Dr. A. P. J. Abdul Kalam, u la long u President ba khatwei jong ka ri India. U la iohpdiang ia ka award Bharat Ratna bad ruh u la thoh bun ki kot kiba pawnam kiba kynthup ia ka “Wings of Fire” bad “Vision 2020.”
Uwei u nong wan jgnoh kai ia ka Museum uba na Assam bad uba dang pule ha Jorhat Engineering College, u la ong ba u dap sa ka jingkmen ban ioh ai khublei-kti ia u Dr. Kalam. U la ong ruh ba u Dr. Kalam u juh pynkynmaw ia u ia ka kamram ba u dei ban leh, kaba u dei ban trei shitom ban pyniar ia ka jong ka jingpyrkhat bad ban trei shitom na ka bynta ka lawei lajong. Uwei u staff jong ka Museum uba la synran ryngkat ia u President barim u la ong ba u dap da ka jingkmen ban synran ia u. ‘Nga la trei hangne ha Museum la 12 snem bad kane ka jingwan jong u Dr. Kalam ka long kawei ka bynta ka ba khraw ha ka jingim jongnga bad ngan iai kynmaw barabor ia kane ka sngi,’ u la ong. U Dr. Kalam u la wan kum u Guest Lecturer ha Indian Institute of Management (IIM) Shillong.