Shillong, 11 Naiwieng:
U MLA barim ka Mawlai Constituency Bah Process T.Sawkmie,ula leit ban jngoh dalade mynta ka sngi ia ki lai tylli ki shnong ba sahdien bha jong ka Mawlai Pyllun, kiba la shah ieh khunswet bad shah phai lyndet ha ki bor Sorkar bad ha ki Nongmihkhmat jong ki san snem bala leit noh.
Kine ki Shnong ki kynthup ia ka Nongkoh low, ka Umsaw-Umja rong bad ka Madan Maw khar, kiba don sha ki bynta ba kyndong jong ka shnong Mawlai Pyllun. Ia u Bah Process la pdiang sngewbha da ki bor pyniaid Shnong jong kine ki lai shnong, kiba la pynpaw ia ka jingheh mynsiem bad jingioh jingkyrmen ban iohi biang ia une u Nongmihkhmat barim ka thaiñ, uba la wanrah ia shibun ki kam pynroi bad ki matti treikam ha manla ki shnong ki thaw.
U Bah Process ula leit iuhkjat nyngkong eh na Nongkohlow bala pdiang sngewbha da u Rangbah Shnong Bah A.Kharwanniang lem bad ki Nongkitkam ka shnong. Une u MLA barim ula leit jurip ruh ia ka Iingskul RCLP Primary School bad iakynduh ia ki Nonghikai jong kane ka skul ban twad jingmut halor ki jingeh bad ki jingdonkam jong ka skul.
Na ka liang u Bah Process ula ai mynsiem ia ki Nonghikai kane ka skul da kaba ong ba un sa pyrshang katba lah ka bor ban ai jingiarap ia ka skul kumba ula leh mynba u dang long u MLA ka thaiñ. U la ong ba un sa wad ruh ia ki lad ki lynti ba kumno yn lah ban iarap ia ki Nonghikai kiba la aiti met bad mynsiem ban sam ia ka jingnang jingstad sha ki khynnah ka shnong.
Haba phai pat sha ka jingdonkam ka shnong,ula ai mynsiem da kaba ong ba un sa pyrshang ban iakren ia ki bor sorkar ba kin khmih lem ia ki jingdonkam u paidbah ha kane ka shnong. U ong, ka shnong kala donkam ban pynheh noh ia ka top um na ka 15000 liter sha ka 30000 liter namar ka shnong kala kham heh bad ban pynbun ruh ia ki kor sorkari kiba don mynta tang 12 tylli hapoh ka shnong baroh kawei. U ong, ka surok ruh ka dei kawei ka jingdonkam ba hakhmat eh bad ula kular ban sa iakren lem ia ki bor pyn iaid ka PWD ba kin khmih lem sha kane ka shnong.
U Bah Process ula pynkynmaw ruh ia shibun ki matti treikam jong u ha kane ka shnong kiba kynthup ia ka jingpynshna ia ka Basketball Court hapoh ka madan skul RCLP bad ka madan phutbol jong ka Shnong, kiba la pynshna na ka skhim jong ka Soil & Water Conservation.
Kumjuh ruh haba leit sha ka shnong Umsaw-Umjarong, ia une u MLA barim la pdiang sngewbha da u Rangbah Shnong Bah I.Rynjah, u Secretary Bah O Kharumnuid, ki Nongkitkam shnong bad ki Nongialam jong ka Seng Samla bad la pynbud da ka jing ialang hapoh ka Iingskul Primary ka Shnong. Ha kane ka jingialang, Ki bor pyniaid shnong kila pynpaw ia shibun ki jingeh ha ka roi ka par hapoh shnong bad iathuh ba ha ki san snem bala leit noh, ka shnong kam shym la ioh satia wat tang kawei ka skhim na u MLA.
Na ka liang u Bah Process hadien ba sngap ia ki jingeh bad ki jingdonkam jong ka shnong bad ka skul, ula kular ban long u nongprat lynti ia kane ka shnong ba kan ioh ia ki kam pynroi pynpar na ka sorkar Jylla. Hangne ruh ula pynkynmaw ia shibun ki jingiarap ba ula leh mynba u dang long u MLA hynrei ula ong ba kane ka shnong kala duh ei ruh ia shibun ki jingmyntoi na u namar ka daw ka jingieng pyrshah bad jingleh Politics jong u Rangbah Shnong barim uba la khanglad ia ka jingwan jong ka roi ka par.
U Bah Process ula leit ruh ban iuhkjat hapoh ka shnong Madan Mawkhar bad iakynduh ia ki bor pyniaid shnong lem bad ki bor pyniaid jong ka skul ban sngap ia ki jingeh bad ki jingdonkam jong ki.
Na baroh kine ki Shnong kila pynpaw ia ka jingkmen halor ka jingwan iuhkjat jong une u MLA barim ha ki shnong jong ki bad pynpaw ia ka jingkyrmen ba un wan phai biang ban long u Nongmihkhmat ka thaiñ, khnang ba ki shnong ki thaw kin ioh ia shibun ki jingiarap bad ki kam pynroi kumba long ha ki 10 snem ka jinglong MLA jong u.
Phi don ban ong eiei?