Leit iuh kjat U President ka China, sha khappud ka Arunachal

Beijing: U President ka Chinese, U Xi Jinping, mynta ka sngi, ula leit jngoh ia ka Nyingchi, kaba dei ka shnong khappud, kaba don syndah jong ka Arunachal Pradesh. Ka jing leit jngoh jong Xi, ka dei, hadien ba ula leit jngoh ia ka Tibet.

U Xi, u hiar khyndew ha ka kad liengsuin ha Nyingchi Mainling, ha ka sngi balang bad la pdiang sngewbha ia u, da ki kynhun bapher jong katei ka thain.

Ha katei ka jingleit sha Nyingchi, U Xi, uba don 68 snem ka rta, ula leit jngoh ruh ia ka wah Nyang, kaba la tip kum ka wah Brahmaputra ha India, lane kaba la tip, kum ka Yarlung Zangbo ha ki nong Tibet.

Ka China, kan tei mynta u snem, ia ka dam kaba heh bah ha katei ka wah Nyang, lane ka wah Brahmaputra, kaba dei ha ka mang pisa san snem, kaba 14 jong katei ka Ri, ha kaba ka la don ka jingkren bynniaw da ka India bad ka Bangladesh, namar ba kan ktah ia ka um, kaba tuid sha kine ki Ri.

Ka Nyingchi, ka dei ka nongbah rit, jong ka Tibet, kaba don ha syndah ka Arunachal Pradesh. Ka China, ka kam ba ka Arunachal Pradesh, ka dei ka bynta ba shathie jong ka Tibet, ha kaba ka India, ka kyntait ia kane ka jingkam jong ka China.