Leit iarap ka RBYF ia ka skul ha Umpowin, ba kin ioh tap tin pynbha ia ka skul

Ki nongialam ka RBYF ha kaba leit iarap tin ia kawei ka skul ha Umpowin

Nongpoh: Ki nongialam ka Ri Bhoi Youth Federation (RBYF), hynnin ka sngi, ki la leit ban ai jingiarap da ki tin sha kawei ka skul kaba la tip kum ka Makathiang Makdoh Secondary School, ka skul kaba kaba la long kum kawei na ki shlem ai jinghikai na bynta ki khynnah hapoh ka shnong Umpowin, ka shnong kaba don ha ki thain Mawlasnai.

Ha katei ka sngi, ba kitei ki nongialam ka RBYF, ki la lah ban leit ai jingiarap sha katei ka skul, la sakhi da ka jingdon u Bah Neverson Makdoh, dkhot ka sengkmie ha ka RBYF, ha ryngkat u Bah Shining Shadap, General Secretary ka RBYF Raid Nongtung Circle, ki nonghikai bad ki khynnah kiba pule hapoh katei ka skul.

Lyngba ka jingiarap ka RBYF da ki tin ba kin sop ia katei ka skul, kaba duna sa tang ki tin ba sop, ka la pynkmen eh ia ki nonghikai bad ia ki khynnah kiba pule hapoh katei ka skul, ha kaba ki la pdiang burom da ka mynsiem kaba kmen eh.

Katei ka skul, ka dei kaba la don kumba 500 tam eiei ki khynnah skul bad kaba la ai jinghikai ia ki khynnah naduh Nursery haduh klas 10, ha kaba ka la long ruh kum kawei na ki shlem ai jinghikai ia ki napoh katei ka shnong bad ki shnong ba marjan ruh kumjuh.

Haba iadei bad katei ka jingleit ban ai jingiarap, na ka liang kitei ki nongialam ka RBYF, ki la pynpaw ba ka nongrim kaba la pynlong ia ka seng ba kan iarap ia katei ka skul, ka dei hadien ba ki la iohi shisha ia kata ka jingdonkam jong katei ka skul ba kin ioh ia ki tin ki ban tap ia katei ka skul bad ka ban sa shong ki khynnah kiba leit ban pule hapoh katei ka skul.