Leit ialam, ia U bah Julius sha iing kashari ha ka sngi saitjaiñ

Shillong,8’lyngkot:
Ha ka por 2 baje tam hynnin ka sngi, la wanrah ia u bah Julius Dorphang MLA ka Mawhati sha ka kashai District & Session Judge. Ki pulit ki la wan ialam ia u na ka lynti kaba don shadien jong ka ophis u Deputy Commissioner, East Khasi Hills da kaba iaid lyngba ia katei ka ophis. La iohi ba ha ka por ba la wan ialam ba u bah Julius, u tap ialade da ka tupia syaid bad u tap ruh da ka tapmoh bad u kah ia ka dur ka dar jong u. Ym shym la pyndait hatkheri ne teh ia ki kti jong u bad la iohi ruh ki pulit kim shym la bat na kti jong u kumba leh ia kiwei pat hynrei la iohi ba uwei u pulit SOT u shu bat na tyrpeng jong u (kumba kdup).
Ha ka por leit ialam sha kashari la ialam da ki pulit SOT bad la bud khrui nadien da ki CRPF bad ki pulit jaiñ stem, ka rukom iaid lynti kaba sted bha, ha kaba bun na ki nongthohkhubor ruh kim ioh ban shon dur bha. Haba la poi ha kashari ki pulit SOT bad CRPF ki la ap shabar, la pynrung ia u bah Julius shapoh bad shabar la don ruh katto katne ngut kiba haing hasem jong u.
Ka jingiakren shapoh ka la neh kumba shiteng kynta eiei bad hadien kata u la mih bad ki pulit ki la ialam biang ia u na ka lynti kaba don shadien jong katei ka kashari bad tang mar ia mih na kashari ki la thep ia u hapoh Gypsy.