Leit iakynduh ka UDP ia u MR, ba duh tulop ki nongtrei MCCL

Shillong:Ar ngut ki nongialam ka United Democratic Party (UDP) ba kynthup ia u Bah Balajiedkupar Synrem, MLA ka Shella ryngkat bad u Bah Titos W Chyne, MDC ka Sohra uba dei ruh u Chief Executive Member ka Khasi Hills Autonomous District Council (KHADC), ki la leit ban ia kynduh mar khmat ia u Myntri Rangbah ka Jylla, Conrad K Sangma ban kyntu ia u ba un shimkhia lem ia ki jingdawa ki nongtrei ka Mawmluh Cherra Cement Limited (MCCL).

Kum ban shu kdew, ki nongtrei ka MCCL ha ka lama ka Mawmluh Cherra Cement Employees’ Union (MCCEU) ki la wan kiew sha nongbah Shillong ban pynlong da ka jingiakhih da kaba shah thngan khlem buh por, naduh ka 8 tarik u Nohprah ha khmat ka Head Office ha Lauchumiere. Kane ka jingwan jong ki sha Shillong ka la jia, hadien ba ki bor ba dei peit bad ka Sorkar kim shym la pynsngap ia ki mat jingdawa mynba ki la pynlong jingiakhih ha Sohra.

U Bah Titos haba ia kren bad ki nongthoh khubor hadien ka jingwan ia kynduh ia u Myntri Rangbah, u la ong, “U Myntri Rangbah ula kular ban shimkhia ia kane ka kam bad kum ki nongmihkhmat ngi la kyrpad ia u ban tuklar halor kane, namar kam long kaba bha ba ki nongtrei ka MCCL kin wan shaduh nongbah Shillong bad hap iakhih da kaba shah thngan khlem buh por na ka bynta ban dawa ia ka hok jong ki”.

“U la ong ba un sa peit bniah bad bishar ia kane ka kam kaba ia dei bad ka jingdawa ki nongtrei ka MCCL”, la ong u Bah Titos, hadien ka jingwan ia kynduh ia u Myntri Rangbah ha ka janmiet Sngi Ba-ar. Ki nongtrei ki la shim ia ka sienjam hadien ba ki bor pynïaid jong kane ka karkhana pynmih dewbilat kaba la rim tam ha ka jylla Meghalaya kam shym la siew satia ïa ka tulop jong ki nongtrei mynta la 15 bnai kynthih. Katkum ka jingïathuh jong u President, Bah S Diengdoh, ki nongtrei jong kane ka karkhana ki la duh ïa ka tulop kaba san bnai kaba ki dei ban ïoh jong u bnai Naiwieng 2015 haduh u Lber, 2016 bad kumjuh ruh sa ka tulop kaba 10 bnai kata, naduh u bnai Rymphang 2020 haduh u Nohprah, 2020.

Ka jingdawa kaba hakhmat eh mynta ka long ba ka Sorkar ka dei ban shimkhia ïa kane ka kam bad lada ka karkhana kam ïaid kam dei pat ban ktah ïa ki nongtrei, namar ba ki nongtrei ki dei ki briew bad ka karkhana ka dei tang ka tiar.

“Ngi khmihlynti ba ka Sorkar, ka Management bad kiwei kiwei ki bor ba halor ka dei ban shimkhia ïa kane ka kam bad ban kham pynbha ïa kane ka karkhana ha ka lynti kaba dei khnang ba ynda ka la lah ban pynmih kham bun ïa ka dewbilat kan sa lah ban weng ïa kine ki jingeh jong ngi,” la kyntu u Bah Diengdoh.