Leit die kyiad sha ki thliew iing briew

Bah Monarch Shabong

Ka sorkar Jylla, ka la dep rai dang shen, ban ailad ia ki dukan kyiad, ba kin leit die kyiad sha ki iing briew bad katei ka rai khlem pep, ka la pynhiar mynsiem hi jrut, ia ki nongdie bad kumjuh ia ki nongdih kyiad ruh.

Shu long ba ka don ka jing bym shai khyndiat lane lehse, ka don ruh ka jing bym pyrkhat ba kham jngai jong ka sorkar bad kata ka long, ba ka jingleit ai kyiad, ka dei ban trei kam ruh ia ki nongdie bad ki nongdih kyiad lieh, namar ba ki nongdie bad ki nongdih, ki don la ka kyrdan, ha kaba u don uba lah ban pynlut kaba san hajar shi bilor bad don ruh uba lah ban pynlut kaba san phew shi bilor.

Don kiba pyrshah ban leit die kyiad sha ki iing briew, hynrei katei kam da iapher than, namar ba ki ju don hi bun bah kiba ju ia thied lem ia ki tiar ki tar, haba ia donkam ki paralok parajor, lada dei ka doh, u jhur ne kino kino ki tiar bad ka kyiad ruh, ha uba dih, ka dei ka jing donkam kaba kongsan hi bad mynta lei ka sorkar ka ioh ban ialeh pyrshah ia ka khlam corona, ka dei lyngba ka khajna kyiad.

Hynrei ka shu don tang khyndiat ka jingwit bad kata ka long ha kine ki sngi, ki la bun kiba dih ban ia ki bym dih bad ha ka shnong kaba don shi spah ngut ki shynrang, lada san phew ngut, kin ia thied kyiad, kumta ha ka juk jong ka khlam corona, la eh than ia ki volunteer shnong, ba kin ailad ba kin rung kin mih ki nongdie kyiad haduh san phew sien ha ka shisngi.

Ka sorkar Jylla, ka la dei ban pyn kylla khyndiat ia ka ain bad kata ka long ba kan ai khajna sa khyndiat ia ki shnong bad kata ka long ba ha ki shnong kiba heh ha sor, ia ka kam thied kyiad, yn aiti noh ba kin pyniaid ki shnong bad kata ka long ba baroh ki nongdih, kiba don 100, 200, 300ngut kin ai ia la ki jong ki brand ba ki kwah ba ki nongdie kyiad, kin iakren lypa ia kawei, ar ka dukan bad kin buh ia ka por ba kin leit ha shnong bad hangta ki volunteer shnong, kin shim ia la ka jong ka bynta ban leit pynpoi ia ka kyiad sha kiba donkam.

Ha kane ka juk kyrduh kam, lada ki shnong ki shimti, kin pynbiang ruh ia ka doh thang, ka doh syang bad kin ia ioh kam ei kito kiba smat ban pynshet pyntiew bad katei khlem pep, kan sa long ka lad ai jing kamai lane iarap bei pisa sha ki bor pyniaid shnong bad kumjuh ruh sha kito ki nong shet jyntah bang, na bynta ki nongdih.