Nongstoiñ: U lum Mawthadraishan u dei u wei na ki lum ba jrong tam hapoh ka thaiñ West Khasi Hills District bad u ba la wan ba ar ha ka jingjrong hapoh ka Ri Khasi bad Jaintia bad u tei u lum u la paw bad bna nam lah kham slem hapoh ka Jylla Meghalaya hi baroh kawei. Hynrei ka jingpaw nam jong u tei u lum ka la shu long leh noh ei, namar kiba bun ki nongshang kai pyrthei ki kyntait ban leit sha u tei u lum namar ka jingsniew kaba palat jong ka surok bad don ruh kiba hap phai noh tang ha shiteng lynti.
Ka jingpaw jong u tei u lum ka dei namar u long u lum u ba jrong tam hapoh ka thaiñ bad ha ka por ba khuid bad sngur bha ka suin bneng na jrong jong u tei u lum lah ban iohi ia ki lum Himalaya shaphang shatei (North) bad lah ruh ban iohi ia ka Ri lum Garo Hills sha phang sepngi, ka East Khasi Hills shaphang mihngi bad kumjuh ka Ri Bangladesh shaphang shathie bad ha jrong jong u tei u lum ki don ruh shibun tylli ki pung kiba itynnad bad ithiang haduh katta katta bad u tei u lum u don mar syndah bad u lum Mawphanlur.
Ban poi sha kliar jong u tei u lum hap ban iaid na ka surok khyndew na ka surok bah jong ka shnong Nongshillong kaba don ruh shaphang ka diang haba wan na ki thaiñ Shillong bad mar ia sdang ban iaid na katei ka surok ka long ka surok khyndew kaba dang khohruh khohram tad haduh ban da poi sha kliar jong u tei u lum bad katei ka surok ka don kumba 5 KM ei ei ka jingjngai kata na ka surok Mawkohngei (Nongshillong) Mawthadraishan na katei ka surok 2 KM, ka dei ka surok PMGSY kata na Mawkohngei bad kaba la don ruh mynta la kumba 20 snem ei ei.
Ka surok khyndew kaba sniew ban kiew sha kliar u Mawthadraishan.
U bah F.L Nonglait Acting Sordar jong ka shnong Domkseh kaba dei kawei na ki shnong kaba don sha jrong jong u tei u lum, u la iathuh ba kiba bun ki nongwan jngohkai pyrthei kiba thmu ban wan sha kliar jong u tei u lum, bunsien ki phai noh tang ha shiteng lynti, namar ka jingsniew palat jong ka surok ka pynthait bad pynngiah noh ia ki bad katei ka jingbym wan ki paidbah sha u tei u lum ka la long ka jingduh nong kaba khraw ia ki nongshong shnong jong katei ka thaiñ khamtam ki briew kiba wan ruh ki leit phai ha ryngkat kiba bun ki jingkynthoh.
Katei ka surok ym tangba ka ktah ia ki nongwan jngohkai pyrthei, hynrei kiba shah ktah palat ki dei ia ki shnong kiba pyndonkam ban iaid lyngba katei ka surok bad kitei ki kynthup naduh ka shnong Mawkhmahrang, Umdum, Dombah, Marwir, Mawpon, Umjakoit, Domkseh bad Lawdisai.
U bah Kharlessbon Nongbri President ka Seng HANM Mawthadraishan Circle ubala leit ban jurip ia katei ka surok haba iakren bad u nongthoh khubor, u la ong ba na ka liang jong ka Seng kan sa thoh sha ka sorkar bad sha ki bor ba dei peit ba kin leh ei ei noh ia katei ka surok bad lada kim sngap na ka liang jong ka Seng kan sa shim da kiwei pat ki lad ki lynti ban pynbor ia ka sorkar bad ia ki bor ba dei peit.
Na ka liang jong u nongthoh khubor u la iohlad ruh ban iakren bad u wei na ki nongwan jngohkai ia u tei u lum ha kaba u la pynpaw ia ka jingsngewsih ba kat ka jingitynnad jong u tei u lum, hynrei ka lynti bad ka surok ban iaid lyngba pat ka long kaba sniew haduh katta katta bad ha ka por lyiur lei lei ym i nud satia ban leit tur sha u tei u lum bad ha kajuh ka por u la kyntu ruh ia ki bor ba halor ba kin leh ei ei na ka bynta katei ka surok namar katei ka dei ka jaka jngohkai kaba la paw nam bha bad kaba lah ban ai jingmyntoi ruh ia ki nongshong shnong katei ka thaiñ.