U Working president ka United Democratic Party (UDP) u Bah Bindo M Lanong u la kynnoh ba kumba 16-17 tylli ei ei ki Constituency kiba don ha kane ka jylla, la jop elek shon ka Congress da kaba shu leh tuh ia ki mashin Electonic Voting Machine (EVM).
“Katkum ka jingtip ba la ioh, kumba 16-17 tylli ki constituency la leh tuh ia ki EVM kynthup ha ka constituency jong nga (East Shillong constituency)” , la kam u Bah Bin do haba kren mynta ka sngi Nyngkong sha ki lad pathai khubor. U Bah Bindo u la shah rem ha ka Kong Ampareen Lyngdoh ka Congress haduh palat san hajar vote.
“Ngi long kiba la khreh ban sei ia ki sakhi satar halor kane”, la ong biang u Bah Bindo haba kylli hato u don ki sakhi halor kane.
“Ha baroh ki constituency ha kane ka elekshon ba dang shu dep, la mih ka jingkhnium na ki paidbah ia ka jingtreikam jong ki EVM, bad ha ka constituency jong nga, la don san tylli ki mashin EVM ba sniew”, la bynrap biang u Bah Bindo.
U Working President ka UDP uba long ruh u Symbud Myntri Rangbah barim ka jylla, u la ong ba ki mashin EVM ki dei ki tiar ba suk ban leh tuh, bad ha kane ka elekshon MLA ha kane ka jylla ba dang shu dep, la suba jur ba la don ka jingleh tuh da kaba donkti ki briew jong ka company ba shna ia ka mashin EVM bad ki technician, la kynnoh shuh shuh u Bah Bindo.
U la ong ba ka long kaba lyngngoh ba ki Congress tang ia mar dep kut ka por ha ka sngi thep vote, ki la shad la kmen lypa ba la dep jop ha kiba bun ki constituency bad kane ka long ka jingsuba ba la don ei ei ha lyndet jong kane.
“Ka long kaba sngew lyngngoh ba ka party Congress kaba la dei ban rem kput, ka jop kput pynban”, la ong u Bah Bindo bad bynrap wat ki para Congress ki la sngew lyngngoh ia ka jingjop bun ka party namar ba kim khmih lynti ba kan jop haduh 29 ngut ki MLA.
Katkum ka jingong u Bah Bindo, namar ki daw ba shongnia bad hadien ba la lap ia ka jingshisha, na ka liang ka UDP ka la rai ban pyrshah beit shi syndon ia ka jingpyndonkam ia ki mashin EVM ha ka elekshon ha kane ka jylla la ka dei ha ka MDC elekshon ne ha ka MLA ruh.
“Ngi la phah ia ka jingujor ba pyrshah ia ka jingpyndonkam ia ki mashin EVM sha u Chief Election Commissioner ka India la katto katne bnai halor kane, la ong u Bah Bindo.
Ha kajuh ka por, u la iathuh ba ha ka jingialang ba la khot da ka parliamentary committee ba long ha ka 5 tarik Naitung, ha Pinewood Hotel, Shillong baroh ki seng sain pyrthei kiba don na ka thain North East ki la pyrshah da kawei ka jingmut ia ka jingpyndonkam ia ki mashin EVM. “Wat ki nongmihkhmat na ka Congress ha katei ka jingialang ki pyrshah”, la ong u Bah Bindo bad bynrap ba lada ka Election Commission ka dang pyndonkam ia ki mashin, ka mut ba ba ym tang ba ki paidbah ki duh ia ka jingshaniah ha ki mashin EVM hynrei wat ia ka election commission kaba pyniaid ia ka elekshon.
Lah ban kdew ba ka UDP ka jop tang 8 ngut ki MLA ha kane ka elekshon ba la dep na ka 11 ngut bad ka Congress ka la kiew na ka 22 sha ka 29 ngut, katba ka NPP kaba don 14 ngut ka la hiar sha ka 2 ngut ki MLA, bad ka HSPDP kaba don ar ngut ka la kiew sha ka 4 ngut.
Phi don ban ong eiei?