Leh torti ki nongtrei phatok Tura:Roshan

Shillong, 19 Nailar:
Ka myntri kam poh iing ka jylla ka Kong Roshan Warjri ka la ong ba ka jingtorti jong ki nongtrei ka phatok ha Tura District Jail, ka la pynlong ia u Area Commander ka GNLA u Tenndy D Sangma ban lait phet na phatok.
‘Katkum ka jingtohkit ba nyngkong, ka jinglait phet utei u dkhot ka GNLA ka dei na ka jingleh torti ki nongtrei ka phatok kiba don hapdeng ka por 5 haduh 8 baje janmiet”, la ong ka Kong Roshan.
Ka la ong ba kumba hynniew ngut ki koidi naduh ka Ward number 3 ki la thmu ban phet tuh. “Hynrei la lah noh ban tem ia kane da kiwei ki nongtrei ka phatok bad tang u GNLA u la lait phet” la ong ka myntri kam pohiing ka jylla.
Katkum ka jingong ka Kong Roshan, ar ngut ki nongtrei u Sushil Ch Boorah bad u Elington Nongsiej la suspen na ka kam katba uwei uba shu trei shipor u Rajesh Kumar Balmiki la weng noh na ka kam.
Ka la iathuh ba ki pulit ki dang pynlong ia ka jingthwet kaba jur ban kem biang ia utei u lehnoh uba la lait phet.