Leh sop sop ka Assam ban tan um na Wah Umsiang ha Ri Bhoi

Nongpoh: Ki nongialam ka FKJGP bad HYC na Mawhati, myn hynnin ka sngi ki la leit ban jurip ia ka jaka kaba la thmu shim Umbam ka Assam na ka Wah Umsiang, katei ka jingleit jurip ka dei hadien ba ki la ioh jingtip ba ka la don kata ka jingthmu ka Assam ban wan shim Umbam na ka Wah Umsiang kaba don ha Ri Bhoi.

Ia katei ka jingleit jurip la ialam da u Bah Shanlang Diengdoh, President ka FKJGP Mawhati Circle, nangta kiwei ki nongialam ka HYC na Mawhati, kumta ha katei ka jingleit jurip kitei ki nongialam seng, ki la lap shisha ba ka la don shikata ka jingthmu shim um ka Assam na katei ka Wah Umsiang.

Lyngba katei ka jingleit jurip, kitei ki nongialam seng, ki la lap ba ka Assam ka la dep ban pynbiang lut nadong shadong, na ka bynta ban shim um na katei ka Wah ban pynpoi sha Assam, ha kaba ka jingbteng ia ki Pipe Um ban shim um na katei ka Wah la dep lut nadong shadong, hynrei kaba sah mynta ka long satang ban pyndep ha ki bynta jong ka Meghalaya.

Hadien ba la lap ia katei ka jingshisha, u Bah Shanlang Diengdoh, u la ong ba ki la pynpaw ia ka jingpyrshah kaba jur halor katei ka jingthmu shim Um ka Assam, ha kaba ki la oong ruh ba katei ka jingwan shim um ka Assam na katei ka Wah, ka lah ruh ban don ruh ia ka jingthmu ban kyntur ia u pud u sam ka Meghalaya.
Ym tang katta, hynrei utei u Nongialam ka FKJGP, u la ong ruh ba ka jingthmu ka Assam ban shim um na katei ka jaka, kata da kaba pyntreikam lyngba ki Mashin kiba heh, kan ktah ruh ia katei ka thain bad ia ki longdien mandien kiba sah ha katei ka jaka, kaba dei ruh kawei na ki thain kaba la sah tang da ki Khasi suda.
Kumta halor katei ka jingthmu shim tan um ka Assam na katei ka Wah, u Bah Shanlang Diengdoh, u la ong ba na ka liang ki arseng, ki kyntu ia sorkar jylla bad ia ki Bor Distrik ka Ri Bhoi, ba ki dei ban tuklar lem, na ka bynta ban pynsangeh noh shisyndon ia katei ka jingthmu ka Assam ban wan tan Um na katei ka Wah Umsiang.