Shillong, 5 Rymphang:
Ka UDP Nongkrem Circle, ha ka jingialang, kaba la long ha ka 3tarik mynta u bnai, ka pynrem jur ia ka jingsngap jar jong U Bah PN Syiem CEM ka Khasi District Council, halor ka jingpynbiang ia ka lai klur tyngka, kaba dei jong ka 8 Nongkrem Constituency, kaba la mang ia kiwei de ki Constituency.
Ka 8 Nongkrem Constituency ka dang ioh jingtip ba la pynrung ia ki scheme ha ka 8 Nongkrem Constituency tang Rs. 1,12,00,000.00 bad U Bah HS Shylla, MDC, ba dang shu jop, u la iathuh ba u la dep pynsngew ha u CEM ba u dei ban pynbiang ia kaba dang duna, kata, T.1,88,00,000.00 ban dup long Rs. 3,00,00,000.00 kumba la bhah ia baroh ki constituency. Ka UDP Nongkrem Circle, ka iathuh ruh ba ka Sorkar Jylla kam shym la pdiang ia ka jingtei ia ka Resort Centre kaba ha Jingkieng Kalong kaba la mang T.10,00,000.00 da ka KHADC, kumta u CEM u dei ban pynbiang ia ka hok kaba ka 8 Nongkrem Constituency, ka dei ban ioh bad kumjuh ruh ia kiwei ki 5 tylli ki MDC Constituency kiba dang shu dep jied ia ki MDC jong ki ha kane ka elekshon kaba shu dep na katei ka 10 klur. “Ngin ym shah da lei lei ruh ba u CEM un pyndonkam da ka bhah jong ngi sha kiwei pat ki scheme” ong shuh ka kyrwoh.
Ka jingialang, ka la rai ruh ba lada donkam ki paidbah jong ka 8 Nongkrem Constituency kin leit ban dawa ia kane ha ka ophis jong u CEM, KHADC. Ka jingialang ka la pynrem jur ia ka jingmushlia jong u CEM Bah PN Syiem ia ka jingialang paidbah ka ban long ha ka 7tarik mynta u bnai 2017 ha Madan Laitkor ban pyrshah ia ka MUDA da kaba u la ia hap jingmut ia ki katto katne ki dkhot jong ka General Executive Committee jong ka Laitkor Dorbar Pyllun kiba la leit khot ia u ban wan ha katei ka jingialang, ha kaba u la ai jingmut ia ki nong Laitkor, ba u MDC Bah HS.Shylla bad u MLA Bah Arden M. Basaiawmoit kim dei ban don bad ai jingkren ha ka jingialang ka ban long ha katei ka sngi.
Ka jingialang, ka sngewthuh shai kdar ba kane ka dei ka buit politic jong u Bah P.N.Syiem, CEM u ban sa seng la ka PDF kum kawei pat ka seg riewlum, kaba thymmai bad ba u la don la u briew ban pynieng na Nongkrem Constituency na ka PDF bad kane kan sa paw pen ryngkew ynda la dei ka por.
Ka jingialang jong ka UDP, ka khot ia ki paidbah ba ki dei ban mih ryntih shaid ha katei ka 7tarik mynta u bnai, ban ia tylli lang kawei ha kaba ieng pyrshah ia ka jingkyntur pud jong ka MUDA sha ki jaka nongkyndong, kata, hadien ba ka General Executive Committee jong ka Laitkor Dorbar Pyllun ka la shim ia ka rai ban pynbeit ia ka prokram, ha ka step 4tarik Rymphang 2017, da kaba la rai ban khot bad phah kren ia u MLA bad ia u MDC ha ka 7tarik Rymphang 2017 bad phah pynpoi biang ia ki notice sha ki shnong kiba la thut halor ka notice ba la phah mynshwa kaba khlem kynthup ia u MLA bad MDC ban ia don lang bad ai jingkren ha katei ka sngi.
Ka jingialang ka la rai ban thoh sha u President Rangbah jong ka UDP halor ki jingleh jingkam jong u Bah P.N.Syiem, CEM kiba long pyrshah ia ka seng UDP ha Nongkrem Constituency naduh ka por ba ia kanbas elekshon wat haduh ka miet jong ka 12tarik Nohprah 2016 kaba long ka miet khadduh shwa ban thep vote ia kaba la pynsngew ha u kham mynshwa, ong ka kyrwoh na U Bah Teiskhem Kharmuti, General Secretary, ka UDP Nongkrem Circle.
Phi don ban ong eiei?