Leh shiliang ka Health Dept, ha ka thungkam ia ki nurse

Shillong, 6 Nailar:
Ki kandidet kiba pyndep ia ka jingpule nurse bym dei na ka bhah jong ka sorkar, la kynnoh ba ki la shah leh shiliang ha ka thungkam ha ka tnad ka koit ka khiah jong ka jylla.
Kane ka tnad ka la pyndonkam ar tylli u diengkot ha ka rukom pynrungkam hapdeng ki kandidet kiba pyndep na ka bhah jong ka sorkar bad kito bym leit pule na ka bhah jong ka sorkar.
Katkum ka jingpynbna ha kane ka sngi Thohdieng ba la dep, na ka bynta 360 tylli ki kam nurse ba lait ha ki district hospital ha ka jylla, ka tnad ka la pynlait noh ia ki kandidet kiba pas na ka bhah jong ka jylla ban thoh ia ka written test.
“Ki kandidet kiba pyndep na ka bhah jong ka sorkar, kin wan mih tang ia ka screening test,” la ong ka thymmei khubor ha kane ka sngi Hatmajai.
Ha kawei ka liang, la iathuh ba ki kandidet ki bym dei na ka bhah sorkar, kin hap ban shong ban ialeh ia baroh ar tylli kynthup ka screening bad ka written test kaba la buh ban long ha ka 10 tarik Nailar.
Katkum ka thymmei khubor, la iathuh ba kane ka dei ka sien ba nyngkong ba kane ka tnad kan pyniaid ia ka eksamin thungkam ha kane ka lynti bad ka long ruh ka jingpynkhein ia ka Reservation Policy ka jylla.
Kaba lyngngoh ka long ba wat ki doktor ruh kiba pyndep ia ka jingpule MBBS na ka bhah jong ka jylla, kin hap ban shong ban iakhun ia baroh ar tylli ki eksamin ka written bad ka personal interview ba la pyniaid da ka MPSC.
“Ngim lah ban don ar tylli ki rukom thungkam na ka bynta kajuh ka kam. Kam don nongrim ban leh shiliang iano iano. Ki kandidet kiba dei na ka bhah jong ka jylla ki dei ban ioh kajuh ka jingleh bad kito ki bym dei na ka bhah ka jylla ruh namar ba ki dei na kane ka juh ka jylla hi bad ki trai shnong”, la ong ka thymmei khubor.