Leh politiks, ka sorkar NPP, ong ka HNLC

Shillong:U Bah Sainkupar Nongtraw, General Secretary ka seng kieng atiar ka Hynniewtrep National Liberation Council (HNLC), mynta ka sngi lyngba ka kyrwoh, u la kynnoh ba ka sorkar synroplang lang ka ba lamkhmat da ka NPP, ka shu leh politiks ia ka jing iakren iasuk bad ka seng.

U Sainkupar Nongtraw u la ong ruh ba ha ki por ba la dep bun ki seng sain pyrthei, ki la pynpaw ba kwah khot iakren iasuk ia ka HNLC, na ka bynta ban wanrah jing iasuk hapoh ka jylla hynrei baroh ki dei tang ki kam politiks.

Kumban shu pynkynmaw dang shen u president ka Meghalaya Bharatiya Janata Party (BJP) u bah Ernest Mawrie u la kam ba ka Meghalaya BJP ka kloi ban khot iakren iasuk iaka HNLC naka bynta ban wanrah biang iaka jing suk hapoh Meghalaya.

U General Secretary ka HNLC u Sainkupar Nongtraw u la pynpaw ba ka seng ka kloi ban wan iakren iasuk bad ka sorkar lada ka jing tyrwa ka Meghalaya BJP kadei kaba don nongrim.

Nalor kane u Sainkupar Nongtraw, u la kam ruh ba don ki Minister na ka sorkar synroplang ka jylla ka MDA kiba arsap, ha ka jing iadei bad ka jing kwah ka HNLC ban wan iakren iasuk bad ka sorkar. U Bah Sainkupar Nongtraw u la iathuh ruh ba u la iakren bad uwei na ki minister ka sorkar MDA, hynrei kam don jing shai halor ka jing tyrwa iakren iasuk ka HNLC bad ka sorkar.