“Leh Politik u bah James Sylliang ia ka Agrovet”

Shillong, 16 Nohprah:
Ka Joint Action Committee kaba pyrshah ia ka Meghalaya Agrovet ka la kynnoh ba ka KHADC ka la shah ialam bakla ha u bah James Sylliang bad ka la kynnoh ruh ba u bah James Sylliang u la leh politik ha kaba ia dei bad ka jing khot bishar ia ka kam kaba ia dei bad ka jingujor ia ka Meghalaya Agrovet.
Ka kyrwoh na u bah Aiban Syiem, Vice Chairman JAC pyrshah Megha laya Agrovet u la ong ba ka KHADC lyngba u Joint Secretary sha ka Executive Committee u la khot bishar tang ia ka Megha laya Poultry Farmers and Welfare Association bad ki shnong kiba ia shah sha katei ka kompeni kum ka Khlieh Umtrew, Raitong, Tdoh Umsiang, Mawthei, Sohpdok, Umtangi, Paitklong, Tiehwieh, Nongkya, Thad, Umlai teng, Laiphewdiengngan, Mawdiengngan, Mawkynrong, Ksehkynjoin bad kiwei kiba dei ki shnong ki bym shym la shah ktah ha ka Meghalaya agrovet bad ki bym pyndonkam um na ka tyllong um ba pyntuid jaboh ka Agrovet, katba ia ki shnong kiba shah ktah pat kata kum ka Nongjri bad 6 tylli ki shnong kiba hap hapoh ka Umsning Town Dorbar ym shym la khot satia bad kumjuh ruh ia ka JAC ym shym la khot satia. Ka kyrwoh khubor ka la kynnoh ba katei ka jingleh jong ka District Council ka pyni shai ba ka don eiei sha lyndet ka la kynnoh ba la khot tang ia ki dalal jong katei ka kompeni ha ka sngi bishar ka ban long ha ka 16 tarik u nohprah ha ka por 10:30 baje ha Hall ka MDC Hotel. “Ngi sngew phylla bad pyrshah jur ia kane ka jingthmu ba sha lyndet jong ka KHADC bad kum ka JAC ngi sngewthuh shai ba kane ka dei ka Plan ba la pynkhreh lypa da u Bah Bhalang Phanbuh bad U MDC ka Mawhati Bah James Sylliang ryngkat ki buit poh ka KHADC” ong katei ka kyrwoh kaba la byrngem ba lada ka jingbishar kan iaid beit shakhmat na ka liang jong ki ruh kum ka JAC kin khot ia ka hearing paidbah jong ki shnong kiba tan um na katei ka jaka bad ka la byrngem ba kan ia khun ha ban da kut la ka long ha kano kano ka bynta ruh bad ka PIL ka dei ka lynti kaba hakhmat kaba ki la buh.