Leh donbor u Sordar Nongsteng: HNPF

Shillong, 26 Naitung:
Ka Hynniewtrep National People Movement (HN PM) Sohra circle ka la kynnoh ba u Sordar ka Hima Nong-steng ba hap ha Shella confederacy u Bah Lit Malngiang uba la leh donbor ban ai wai ia ka jaka kaba hynriew akar ka jaka shnong sha uwei u briew ba nabar shnong.
Ha ka jingpynlait khubor, u President ka HNPM Sohra Riwar circle u Bah Kitbor Hynniewta bad u Bah Rangdajied Donshiew na seng kmie, hadien ba la ioh ia ka jingujor na ki paidbah ka Hima Nongsteng ia ka jingleh donbor jong u Sordar, ka shim khia ia kane ka kam namar ba kane ka jingleh jong u Sordar ka long pyrshah ia ka rukom pyniaid ka shnong kaba leh naduh mynshwa hyndai hynthai.
Ki la ong ba katkum ka KHADC, kam shym la ai bor ia ki rangbah shnong, ki sordar halor ka khyndew ka shyiap hynrei ka jingleh u sordar ka NongSteng ka la long ka jinguhroit.
Halor, kane ka seng ka la kyntu ia u Syiem ka Hima Sohra ba un shim khia halor kane ka jingleh donbor jong u sordar katei ka Hima ban shu ai ia ka jaka haduh hynriew akar sha u briew ba nabar shnong,la pynkut ka kyrwoh na kine ki nongialam ka seng.