Leh burom Soso Tham

Shillong, 19 Nohprah:
Ka Khasi Students’ Union Mawlai Circle myn hynnin ka sngi ka 18 tarik ka la pynlong ia ka jing kynmaw burom ia ka lyngkhuh sngi Iap ba 76 u Myllung SOSO Tham uba long u Riewkhraw ka Jaitbynriew uba la noh synñiang ha ka thoh ka tar u khasi lyngba ki kyntien ba shongkhia thew bad ba shong sbai ia ka pateng jong ka Jaitbynriew da kaba pynlong ia ka jing buh syntiew bad ka jing ialang ba lyngkot ha u Mot sah kynmaw jong une u Myllung hapoh ka Skul Bah Nehu.
Ha kane ka sngi la wan ban ia shim bynta da ki dkhot na ki unit ba pher-bapher kiba hap hapoh ka jylli trei kam jong ka Mawlai Circle, kynthup ruh na ki Dkhot ka KSU Nehu Unit ryngkat ki Dkhot jong ka Executive Committee jong ka Mawlai Circle hapoh ka jing ialam u President jong ka Seng u Samla Biangbor Paliar.
Ha kawei pat ka khubor, na ka liang ka HYC Mawlai Circle ha ryngkat ka FKJGP Mawlai Circle, ki lah mih ryntih lang ban leit buh syntiew i’u khraw pyrkhat ka Jaitbynriew, u Myllung Soso Tham, uba lah kynjoh sha ka 76snem ka jingkhlad noh ka jong u na kane ka sla pyrthei.
Ha kane ka sngi, ki dkhot ka HYC Mawlai ryngkat lang bad ki dkhot ka FKJGP Mawlai ki lah ia poi lang ha phyllaw U Soso Tham Auditorium bad lah ioh ruh ia ki jingkren na ki nongialam jong baroh ar tylli ki seng.
Ha shuwa ban buh syntiew lah sdang shuwa da ka jingsngap jar ba 1 minit, bad lah buh syntiew pat da ki nongialam kine ki ar seng, lah ioh ruh ia ki jingkren pynkynmaw shaphang ki kam bah u Myllung Soso Tham da u President ka FKJGP Mawlai, samla Marbud Dkhar bud pat sa da ka jingkren na u President ka HYC Mawlai, samla Donboklang Kharlyngdoh.