Leh burom ki nongialam HNLC, ha ka lyngkhuh sngi iap U Bah Cherish

Shillong: Ki dkhot ka Hynniewtrep National Liberation Council (HNLC) kiba don ha Shillong na ka bynta ka jingiakren iasuk, ki la iohlad ban leit leh burom ia u nongialam barim ka seng, u Bah Cherishterfield Thangkhiew ha ka jingdap ar snem ka jingkhlad noh jong une u nongialam ka seng.

Na ka liang ka Sorkar ka la bthah ia ki dkhot ka seng HNLC ban leit buh syntiew ha ka por 8 baje mynstep hynne ka sngi ka 13 tarik Nailar, hynrei na ka liang ka HNLC ka la pynpaw ka jingpyrshah ia kane ka hukum jong ka Sorkar, namar na ka liang kiba haïing ki la pyntip paidbah ba ka jingleit buh syntiew kan long ha ka por 2 baje nohphaisngi, bad na ka liang jong ki dkhot ka seng ruh kiba don ha Shillong ki la don ryngkat ha ka por ba la leit buh syntiew lang ki bahaïing.

Hynnin ka sngi, u Publicity Secretary ka HNLC u bah Sainkupar Nongtraw u la byrngem ba ka jingbthah ka sorkar ban leit buh syntiew ha ka por 8baje mynstep ha jingtep u Cherishterfield Thangkhiew u General Secretary barim, ba ka dei ka jingthmu ban khein kum ki shakri jongka namar ba ka HNLC kam dei kumta. U la byrthen ba lada ka sorkar ka leh kumne, ka seng ka lah ban kynran dien na ka jingiakren iasuk.

Ha kane ka sngi, kiba haïing hasem, ki paralok, ki riew paidbah kila leit buh syntiew ban kynmaw burom ia u bah Che uba la shah siat iap ha ki pulit la ar snem mynta.