Leh beain ka EC barim ka KHADC, ong ki kur Thangkhiew

Shillong,12 Jylliew:
Ka Kur Thangkhiew –Lai-kpoh ka la kynnoh ba ka Executive Committee barim ka KHADC kaba la ialam da u bah P.N Syiem kum u CEM bad u bah Lamphrang Blah u EM ba dei peit ia ka Elaka, ki la leh be-ain ha kaba ki la weng jubor ia ka jingithuh ka KHADC ia ka Seng Kur Thangkhiew. Ha ka jingia kren bad ki nongthoh khubor mynta ka sngi ha Shillong Press Club, u bah Livingstone Thangkhiew u la ong ba ka kur ka la lap lyngba ka ain wad jingtip paidbah, ia katei ka jingweng be-ain jong ka KHADC ia ka jingithuh ia ka Seng kur Thangkhiew.
U bah Living u la ong ba ha ka 4 tarik u rymphang 2011, ka KHADc k ala ithuh ia ka Seng kur Thangkhiew, katba ha ka 11 tarik u risaw,2012 pat ka la weng noh ia katei ka jingithuh, bad ha ka 21 tarik u jymmang 2013, ka Meghalaya High Court ka la pyndam noh ia ka hukum ka Executive Committee da kaba bthah ba ka KHADc ka dei ban ai ia ka hok jong ki ban ia said.
Ka kur Thangkhiew ka la kynnoh ruh ba ha ka 9 tarik u nailur,2013 ka la phah ka jingkyrpad ban weng noh ia u bah Lamphrang blah na ka shuki EM ba peit ia ka Elaka da ka jingkynnoh ba u la don bynta ban pynmih ia katei ka hukum ha ka 11 tarik u risaw,2012, hynrei katba katei ka jingkyrpad ka dang sah kut , ki la kynnoh ba u bah Blah u la iaid lait ia baroh ki kyndon bad ki ain, bad shimet u la shim ia ka rai kaba shah liang ban weng noh sa shisien pat ia ka jingithuh ia ka seng kur Thangkhiew-Lai kpoh, ong u bah Living.
Halor katei ka bynta u bah Living uba la wan ban synran lang da u bah Kyrmen skhem Thangkhiew, ki la iathuh ba ki wan thep ia ka jingkyrpad sha u bah PN Syiem CEM ha kato ka por ban bishar bha halor katei ka hukum namar la khein ia ki Seng kur kum ki Sengbhalang ne ki kynhun balang kiba donkam ban rejistar hapoh ka Meghalaya Registeration Act 1983, ki la iathuh ba katei ka hukum ka pynduh pyndam ia ki Seng Kur kiba bun, hynrei ki la pynpaw ka jingsngewlyngngoh ba u bah Lamphang Blah, MDc ka Mawphlang haduh mynta u dang bat ia ka kam Myntri jong ka Seng Kur LangBlah bad la ai ia ka sanad da ka KHADC.
Halor kitei kiei kiei kiba ki la pynpaw na ka liang ka Kur Thangkhiew ka la kynnoh ba ka hukum ka long kaba be-ain, kaba shah liang tang na ka bynta ka jingkhwan myntoi jong ki katto katne , bad ha kaba ia dei bad katei ka phang u bah Living u la ong ba ka Seng kur Thangkhiew Lai kpoh ka la leit ban ia kynduh ia u CEM ba mynta ka KHADC u bah Ardent Miller Basaiawmoit ban pynbeit noh ia katei ka kam.