Leh arsap u Mukul ia ka kam Rangbah Shnong ki Khasi bad Garo

Shillong 31  K’lyngkot:
U Chief Executive Member (CEM) ka KHADC u Bah Pyn shngain N Syiem u la bteng ban sangah tyngeh ia u Myntri Rangbah ka jylla u Dr Mukul Sangma, da kaba kynnoh ba u la leh arsap ia ka kam Rangbah Shnong ki Khasi bad Garo.
U Bah Pynshngain u la kynnoh ba u Myntri Rangbah u sngap jar jar ha kaba iadei bad ka jingpynkup bor ia ki dorbar shnong ha Khasi bad Jaintia Hills, katba ia ki  Nokmas ha Garo Hills u la kyntu ba kin pynkhlain da kaba thaw da ki ain ban pyntbit shuh shuh ia ki bad pyniaid ia ki spah mariang kiba dei jong ki paidbah Garo Hills khamtam ia ki  A’king lane ki Nokma.
“U Myntri Rangbah y dei ban pynkup bor ia baroh ki dorbar shnong kumba la bynshet ha ka Sixth Schedule,” la ong u Bah Pynshngain.
Ha ka por ba u kren ha ka jingialang ba khadsaw ki Nokmas ba la wan iashim bynta palat 400 ngut na kylleng ki jaka ha Garo Hills ha Ampati ka South West Garo Hills ha ka sngi Thohdieng, u Mukul u la ong ba ki Nokmas ki dei ban pynkhlain ia ka rukom synshar barim na ka bynta ka roi ka par jong ka imlang sahlang.
Haba kynthah ia kane ka jingkren jong u Myntri Rangbah, u Bah Pynshngain u la ong ba ka  KHADC  ka la dep thep ia ka jingujor Special Leave Petition (SLP) ha ka Supreme Court pyrshah ia ka rai jong ka  High Court ka Meghalaya ia ki rangbah shnong ha kane ka jylla.    Ka  High Court ka Meghalaya ha ka jingrai jongka,ka bthah ba ka sorkar jylla ka dei ban thaw ain noh ia ki Rangbah Shnong ban pynbeit ia ki kynrum kynram. Ka Division Bench ba kynthup ia u Chief Justice Uma Nath Singh bad u Justice T.N.K. Singh ka la ong ba haduh ba ka sorkar jylla kam pat lah ban thaw ain ia ki Rangbah Shnong, ka rai jong u Justice S.R. Sen kaba pynmih haka 10 tarik Nohprah, 2014 kan treikam beit ha ka jylla.Ka kashari ka la ongba ki Rangbah Shnong ki donkam ban pynngat ha ka Right to Information Act namar ba ki dei ki atiar ka jingsynshar ha ki shnong ki thaw, nalor ki jingpeit bad pyntreikam ia ki skhim sorkar.