Shillong: Ki 2 tylli ki longïng ki la shah thombor ha ka kynhun kaba 14 ngut ki briew bad ha katei ka jingjia kawei ka longing ka la shah shoh baroh ar ngut shi lok haduh ba ki la mynsaw jur katba ha kawei pat ka long ki 14 ngut ki la shoh ia u khun bad hadien kata ki la pynlaw lyngkhuid ia ka kmie bad ki shoh ruh ia ka haduh ba ki mynsaw jur.Katei ka dei ka jingjia kaba la jia ha ka 17 tarik mynta u bnai ha ri Lum Garo ha ka shnong Ghugrakandi ( SWGH).
Ha ka jingujor sha ki pulit, ka Smt Runa Begum kaba dei na ka shnong Ghugrakandi ka la ujor sha ki pulit ba ha ka 17 tarik mynta u bnai ha ka por 9 baje mynstep ki 14 ngut ki briew kiba la tip kyrteng kum u Rezzak Miah, Mahammad Miah, Rafique Miah, Rifu Miah, Rizu Miah, Pinku Miah, ka Smt. Saripan Bewa, Smt. Pinky Khatun, Smt. Jashmina Begum, Sahini Begum, Felani Begum, Smt. Anju Begum, Smt. Lazmi Begum bad ka Smt. Jhiki Begum, ki la shoh ia u lok jong ka u Md. Riaz Miah katba u dang don ha ka lynti ban leit sha jingtrei , ka la ujor pulit ba ki la pyrshang ruh ban pyniap ia u bad ha katei ka por ka la tur ban leit iarap ia u hynrei ka ruh ka la shah shoh.
Ha kawei pat ka jingjia, ka Smt. Sunali Khatun na ka shnong Ghugrakandi ka la ujor pulit ba ha katei ka juh ka sngi ka 17 tarik ha ka por 9:30 baje mynstep 2 ngut ki briew kiba la tip kyrteng kum u Rezzak Miah bad u Mahammad Miah, ki la shoh ia u khun jong ka uba dangrit uba la tip kyrteng kum u Md.SabulMiah (10 snem karta) bad katei ka la jia ha ka por ba u dang ialam ia ki masi ban bam phlang. Haba iohi ia kane ka la ong ba ka la leit tur ban iarap ia la u khun hynrei ki la wan ki briew kiba haduh 14 ngut (kijuh kitei ki briew kiba shoh ia ka Begum bad u lok) bad ki la patan ia ka sha ka jaka jong ki bad haba la poi hangtei ka la ong ba ki la pynlaw lyngkhuid ia ka bad ki la shoh la dat bad hadien ki la knieh ruh ia ki ksiar ba ka deng ha shkor.