|
Shillong: Lashai ka 1 tarik Naiwieng kan dei ka sngi sah kynmaw ia ka jingialehkai kriket ha kane ka jylla ha kaba ka lumpung ialehkai ba nyngkong ka Ranji Trophy kan sdang ha madan kriket ha Polo, Shillong. Ia kane ka jingialehkai la ialeh teng naduh mynshwa ha kaba ka Shillong ka dang don ha ka jylla Assam bad ialehkai ha madan Kirkit ne Garrison kaba mynta. Ia kane ka jingialehkai la ialeh hapdeng ka Assam bad ka United Province (mynta ka UP) naduh ka 17 tarik haduh 19 tarik Nohprah 1948. Ki nongialehkai na Shillong ha ka Assam Team ki long (L) L.N. Karamjee, (L) B. Bose, (L) A. Ahmed nalor ki sahep Bilat ba kynthup ia u PW Bullock, RF Kettle bad u L. Atkins. Na ka bynta kane ka jingialehkai kaban long lashai, ka Meghalaya Cricket Association (MCA) ka la jied 15 ngut ki nongialehkai. Ka jingialehkai Plate Group kan sdang 1 tarik haduh 4 tarik Naiwieng, ha kaba ka Meghalaya kan iakhun ia ka Arunachal Pradesh. Ki nongialehaki ki long Jason Lamare – Captain, Punit Singh Bisht (Guest Player) – Vice Captain, Dipu Sangma, Mark Ingty, Bablu Passah, Gurinder Singh(Guest Player), Chengkam Sangma, Yogesh Nagar(Guest Player), Abhay Negi, Raj Biswa, Lakhan Singh, Syllvester Mylliempdah, Wallambok Nongkhlaw, Aditya Singhania bad Bijon Dey. Ki nongialehkai pynap ki long Sanvert Kurkalang, Amiangshu Sen, Tengcham Sangma bad Lakhan Chettri. U coach u Sanath Kumar, Trainer u Rakesh Gohil, Physio: Dr. Vinod Kumar Jain, Manager: OL Warjri. Ka MCA ka wer ia ki paidbah ban wan sakhi ha kane ka jingialehkai kaban long lashai ka sngi haduh ka 4 tarik ha katei ka madan kaban plie ha ka por 7.30 baje mynstep, la ong ka kyrwoh na u Naba Bhattacharjee u Honorary Secretary ka Meghalaya Cricket Association. |