Shillong: Ka Shillong Lajong kan iakhun ia ka Mohun Bagan ha ka pre-quarter jong ka Super Cup, lashai ka sngi ka 11 tarik Iaiong ha Kalinga Stadium por 4 PM. Ia kane ka jingialehkai yn sa pyni ha Star Sports 2/HD bad ha Hotstar App bad Jio TV.
Ka Lajong ka la pylliem ia ka Pune City da 3-1 kol ha ka jingiakhun ba la dep lyngba ki kol jong u Abdoulaye Koffi, Rakesh Pradhan bad u Samuel Lalmuanpuia.
Haba kren sha ki lad pathai khubor, u Coach u Bah Alison Kharsyntiew u la ong ba kaba kongsan ka long ba dei ban ngeit halade bad na kata ka daw kila lah ban poi sha katei ka jaka.
“Hooid, ngi la iakynduh jingeh ha ka lympung I-League ha ka jingiakhun ba la dep hynrei ka jingiakhun lashai kan long kaba eh bad ngi ngeit ha ka jingiatreilang ban ioh ia ka thong. Ngi long kiba pdiang ban iakynduh lashai”.
Ka Mohun Bagan ka la jop mynshwa ia ka Churchill Brothers ha kane ka lympung da 2-1 kol.
U coach u Sankarlal Chakraborty u la ong ba “ ka I-League ka dei la kut. Watla ngi la pylliem ia ka Lajong hynrei ka dei kawei pat ka khana mynta. Ki la pyni ia ka jingtbit jongki ia ka jingiakhun pyrshah ia ka FC Pune City bad ngi la pyni haduh katno ki long haduh kaba kut ka 90 minit. Lashai, ka dei ka jingialehkai kaba thymmai bad ngi shim khia bha ia kane ka jingialehkai”.