Lashai lah ban tur beit ka HYC sha Kashari rKa sngi shah bishar U CEM KHADC

Shillong, 25’lyngkot:
Ka jingialang hapdeng ki Rangbah shnong bapher bapher ryngkat ki dkhot ka HYC kaba la long ha Khasi National Dorbar Hall ha ka sngi saitjain jong ka taiew, ki la shim ia ka rai ba kin leit ban tynruh sah baroh ar tylli ki Autonomous district council ka KHADC bad JHADC ba kin phah ka jingkyrpad sha ka Division Bench ba ka dei ban pynsangeh shuwa noh ia ka hukum ka high court kaba la sloit noh ia ka bor bad ka iktiar ki Rangbah shnong. Katei ka jingialang ka la shim ruh ia ka rai ba baroh ki Syiem, ki Doloi, ki sordar, ki Rangbah shnong ki dei ban ia tylli mlon ban phah ka jingujor sha ka Division Bench ba kan dei ban pynsangeh ia katei ka hukum. Na ka liang ki nongialam ka HYC hadien ba la wai katei ka jingialang ki la ong ba kin buddien ia katei ka kam da kaba kin leit ia kynduh ia baroh ar ki nongialam jong kitei ki ADC ban ia kren halor katei ka mat ba dei ban ujor sha ka Division Bench.
Ia katei ka jingialang kaba la wan ban ia phylliew jingmut bad ban kyrshan da ki rangbah shnong shnong bad ki nongialam shnong na ki shnong bapher bapher khamtam na nongbah Shillong bad ki khapsor , la pyniaid da u President ka HYC u bah Peter J Lawai. Kiwei pat ki nongkren na ka liang ka HYC, ki kynthup ia u bah RobertJune Kharjahrin, u bah Nickson Dohling. U bah Kharjahrin uba dei u General Secretary ka HYC haba ai jingkren u la kren shaphang ka jingmih katei ka hukum na ka high Court kaba u la ong ba baroh ka dei na ka daw ka jingbym shimkhia ki District council naduh u snem 1952, ha kaba kim shym la thaw ia ki ain ki ban pynkupbor ia ki Rangbah shnong.
U la pynkynmaw ba ka jingpyrshang ban sloit noh ia ka bor ki Rangbah shnong kam dei ka sien ba nyngkong, hynrei ka la jia teng ruh ha u snem 2006, ha kawei ka jingjia kaba la jia ha umsohsun, ha kaba kawei ka briew ka la ujor sha ka Guwahati High Court, Shillong Bench halor ka jingiadei bad ka kam ia die ia thied jaka. U la ong ba mynta pat ka mih katei ka hukum na ka wei ka case kaba u Rangbah shnong ha Jaintia hills um shym la ai jingmynjur, ia kawei ka briew kaba la ioh lok da u bar jylla.
U bah Peter J Lawai haba kren sha ki nongthohkhubor hadie ba la wai katei ka jingialang u la ong ruh ba ka jingialang ka pynpaw ia ka jingbitar ym ia ka high Court kaba pynmih ia ka hukum hynrei ka jingialang ka pynpaw ba ki paidbah hi baroh ki bitar ia ki nongmihkhmat kiba ki la jied la katta phew snem hynrei kim shym la leh eiei ban thaw ia ki ain ki kanun haduh ba la ngat haduh katei ka apot. Halor ka jingiadei bad ka jingleit sha High Court, ha ka 27tarik, U bah Peter, um shym la kren shai, hynrei, ula shu ong “Kumba la pynbeit, kan long hi kumta”.
Ki Rangbah shnong kiba la poi ha katei ka sngi ki kynthup naduh ka shnong Mawkhar, ba la mih khmat da u Dr.B.P.S Roy na Mawklot, na Laitmynsaw, na Nongrim Hills, na umlyngka bad na kiwei pat ki jaka.