Lashai ka Lajong bad ka Aizawl FC ha madan Polo

Shillong: Ka Shillong Lajong kan pdiang ia ka Aizawl FC ha ka jingiakhun jong ka kylla baar ka I-League ban long ha JN Stadium ha Shillong ha kane ka sngi Nyngkong por  8 PM.  Ka tiket ia kane ka jingialehkai lah ban ioh na SSA Stadium, Polo,  Mobile Centre Khyndai Lad bad na Sports Spirit MUDA Complex.

             Ka Shillong Lajong  ka la jop ha ka kylla ba nyngkong ia ka  Aizawl kaba long ha 18 tarik Nohprah ha kaba u Redeem Tlang u la thep ia ka kol ha ka 59 minit. Ha ka jingialehkai lashai ka sngi, ka Lajong ka kyrmen ba kan leh kumjuh ban pynliem biang ia ka Aizawl khamtam ba dei ha jaka jongka.

            Ha ka jingiakhun ba dang shen, ka Lajong ka la iakhaid khlem lah iathep kol pyrshah ia ka Chennai City ha ka 11 tarik ha Coimbatore.  Ka Lajong kam shym la la ban pynurlong ia ki lad ba ka la ioh ha kane ka jingialehkai. Haduh mynta ka Lajong ka don ha ka kyrdan basan da kaba kamai 18 point hadien ba jop 5 sien, iakhaid 3 sien bad shah rem 8 sien.

            Ka Lajong ka la jop khadduh ha ka jingiakhun ia ka Neroca FC ha ka 24 tarik Kyllalyngkot ha Imphal da 2-0 bad ka donkam ban jop ha ka jingiakhun ha kane ka sngi nyngkong pyrshah ia ka Aizawl.

            Ka Lajong ka la ioh ban thep kol 13 tylli  bad ki nongthep kol ba kham paw ki long u Samuel Kynshi, Redeem Tlang, Samuel Lalmuanpuia, Abdoulaye Koffi, Saihou Jagne, Juho Oh, Laurence Doe bad u Daniel Odafin.

            U Coach ka Lajong  Bah Alison Kharsyntiew haba kren hynne ka sngi u la ong ba ka jingialehkai pyrshah ia ka Aizawl ka long kaba donkam bha ia ka Lajong ban jop. Ka dei  ka jingialehkai kaba kongsan bha bad ka donkam ban khur ia ka jingjop.

            “Ngi la trei shitom khamtam ha ki bynta ba ngi tlot ban pyndap ia kaba duna bad ka donkam ban ioh ia ka bor namar ba ngi la iaid kylleng”, u la ong.

            “Ka kynhun ka biang bad ka don ka mynsiem kaba kmen  watla kan dei ka jingialehkai kaba jwat hynrei ngi long ba la khreh.”, u la ong.

            Ka Aizawl FC  ka la iakhaid 2-2  bad ka Indian Arrows ha ka jingiakhun ha ka 16 tarik Rymphang. U Masih Saighani bad u Dodoz ki dei ki nongthep ia ka Aizawl ha kane ka jingialehkai ba la dep.  Ka don mynta ha ka kyrdan ba 6 da kaba kamai 18 point hadien ba jop 4 sien, iakhaid 6  sien bad shah rem 4 sien.

            Dang shen, ka la beh noh ia u coach u Paulo Meneses  hadien ba kam shym la lah ban leh bha bad ka la khot ia noh ia u Santosh Kashyap ban mih bujli uba don ruh ka jingtip bha ia ka Shillong namar ba u la long teng u coach ka Rangdajied United bad ka Wahingdoh FC. Ka Aizawl ka la pynliem ia ka Chennai City ha ka jingiakhun ha ka 13 tarik u Kyllalyngkot ha la iing jongka.

            Ka Aizawl ka la thep 14 kol ha kane ka I-League bad u William Lalnunfela, Yugo Kobayashi, Kareem Omolaja Nurain, Andrei Ionescu, David Lalrinmuana, Lalthathanga Khawlhring, Masih Saighani bad u Leonce Dodoz ki dei ki snar nongthep kol.  U  Yugo Kobayashi na Japan u dei u nongthep ba bun eh ka kol ia ka Aizawl haduh 4 kol.

            Haba kren sha ki lad pathai khubor, u coach u  Santosh Kashyap u la ong ba ki nongialehkai jongu ki la kylla bha ka jingialehkai bad ki la lah ban pyniahap katkum ka sur ialehkai hapoh ka jingialam jongu.

            “Nga kyrmen ba kiei kiei kiba thymmai bad ngin ioh ia ka jingjop lashai”, la ong u Keshyap.

            “Ngi sngew skhem ba ngi la kham biang bad man ka kynhun kam lah ban kiew shajrong, kan shong hap iakynduh shibun ki jingeh hynrei ka lad ka don bun ba ngin ioh ia ka jingjop”, u la ong.

            “Nga kwah ban ban kham bun ka buit ia ka kynhun bad ban ai mynsiem, ngin pyrshang ban pynduna ia ki jingbakla ban ioh ia ka jingjop”, u la ong.

            U la ong ba ka Lajong ka dei ka kynhun kaba shemphang bha namar ba ka don ki nongialehkai nabar ri bad kiba la ialehkai bha ha kane ka jaka lajong kaban kham plie lad ia ki bad ka jingialehkai lashai kan long kaban itynnad bha bad pynkhih mynsiem hapdeng ki kynhun jong kane ka thain ka dongmihngi”, u la ong.