Lashai ka jingialang ki JACATAM

Shillong, 03 Nailar:
Ka rally bah jong ki nonghikai skul bym dei sorkar hapoh ka lama ka JACATAM kan long ha Madan Iewrynghep Lait-umkhrah ha ka 5 tarik Nailar naduh ka por 10:30 mynstep.
Haba pynbna ia kane, u publicity secretary ka JACATAM u Babu Kular Khongjirem u la ong ba ka rally kan iaid beit ha katei ka jaka kumba la pynbna hadien ba ka sorkar jylla ka sngap mynthi ia ka jingdawa jongki nonghikai bad haduh mynta kam shym la ai ktien eiei.
“Ka rally kan iaid beit namar ka jingleh meinah ka sorkar ia ki nonghikai. Baroh ki nonghikai jong ki kynhun bapher bapher la kyrpad ba kin iapoi ha katei ka sngi bad ki dei iakynduh ia ki nongialam jongki na ki district ki zone bapher bapher lada ki don kano kano ka jingsngew bym shai”, u la ong.
Ka JACATAM ka kyrpad ruh ia ki bor pyniaid skul kum ki Managing Commttee, ki Principal, headmaster, headmistress jong ki skul ban ai ia ka jingiasnohkti lang bad ki nonghikai na ka bynta ka jingbha ka pule puthi ha ka jylla.
La sngewthuh ba lada ka sorkar kam sngap hi hadien katei ka rally, ki nonghikai kin sa shim shuh shuh ia ki lad jingiakhih nangne shakhmat.
Lah ban kdew ba ki nonghikai hapoh ka lama ka JACATAM ki la dep pynlong ia ka jingiakhih ba lai sngi ha u bnai ba la dep ban dawa ba ka sorkar ka dei ban shimti noh ia baroh ki kam nonghikai ha ka jylla.