Lap u myntri PHE, ba pher ka rukom pyndonkam ia ki pipe sam umbam ha Meghalaya bad Karnataka

Nongpoh:Ha ka Study Tour na ka jingleit ban ioh jingtip halor ka rukom ban pyntrei ia ka Jal Jeevan Mission, u Bah Renikton Lyngdoh Tongkhar, Myntri ka tnat PHE ha ka sorkar jylla, u la leit ban pynlut por katto katne sngi ban leit jurip ia ka rukom ring um na Tyllong ha Karnakata Bangalore, ha kaba u la ioh ban leit jurip ia ki (Water Treatment Plant) ne ka Tyllong ban shim ia ka umbam kaba don ha Uyyambali WSS, Kodihalli WSS bad Sathanur WSS.

Ha katei ka Study Tour, lehse u Bah Renikton Lyngdoh Tongkhar, un ong ba ka rukom ha ka jingpyntrei ia ka skim JJM ha katei ka jylla bad ha Meghalaya, ka iapher bak-ly-bak, namar ha katei ka jylla ka rukom ban tan um bad haduh ban pynpoi sha ki iing briew, la pyndonkam da ki Pipe jri, katba ha ka jylla la pyndonkam da ki pipe kiba dei da ki nar.
Nalorkata, u la lap ruh ba ka rukom ban sam um sha ki paidbah ha katei ka jylla, la pyndonkam da kita ki Water Meter bad kata ka long ban tip ba haduh katno ki briew ki pyndonkam um ha ka shisngi.

Ha kitei ki sngi kiba u Myntri u la leit ban wad jingtip, u la leit ruh ban jurip ia ka Wah Cauveri, kaba dei ruh kawei na ki Wah, kaba la pynlong kum ka Tyllong ban sam umbam umdih, ia artylli ki jylla kiba kynthup ia ka Karnataka bad Tamil Nadu. Ka Wah Cauveri, ka dei ka wah ba ka jylla Karnataka, ka la thmu ban shim umbam, na ka bynta ban pyndap ia ki 299 ki shnong kiba don ha katei ka jylla bad ba ki heh sorkar na katei ka jylla, ki la iathuh ha u Myntri ka sorkar Meghalaya, ba ka kam ka la iaid shakhmat bad ba kin pyndep tang kumba katto katne bnai.