Shillong: U Chief Executive Member (CEM) ka Khasi Hills Autonomous District Council (KHADC) u Bah Hispreaching Son Shylla hynnin ka sngi Balang u la hiar jurip ia ka thain khappud ka Meghalaya bad Assam hadien ba la ioh ka jingujor na ki paidbah kiba kynnoh leh donbor u Syiem Jirang ban tih maw bad khyndew ha Rani Jirang.
Ha kane ka jingjurip, u CEM u la lap bun ki lum ki la madan na ka jingtih maw bad kaba long ka jingma ka jaidbynriew bad ka jylla.
Haba kren ha ki lad pathai khubor, hadien ba la jurip u Bah Shylla ula ong, hadien ka jingiakren la sngewthuh ba ka jaka ka dei jong ka hima ym ka jaka ki riew shimet kumta ka rai ban sangeh ne ban tih ka shong ha ki paidbah. Halor kane na ka liang u Syiem ula mynjur ban khot kyrkieh ia ka dorbar hima hapoh mynta u bnai ban pynbeit noh, namar ka jingtih maw ha katei ka thain ka long shisha kaba ishyrkhei.
Ula ong bun ki lum ki la madan bad kine ki jaka ba la madan ioh kin duh noh bad leit sha Assam, namar kiba trei ha ki par maw ki dei ki dkhar na Asaam katba ki Khasi ki dei kiba shu shah kyrteng bad ka longma ia ka jaid bynriew.
“La ioh jingtip ruh ba kiba pyntrei ia kitei ki par maw ki dei tang shiiing shi sem bad bun ki dei ki briew jong u Syiem bad kane ka long pyrshah ia ka riti ka dustur,” u la bynrap.
U Bah Shylla ula ong, kin pynlong biang ban jurip ia katei ka jaka ryngkat ki tnad ka sorkar jylla ki kynhun seng bhalang ban pynshkem ia u pud u sam bad ka sorkar jylla ka dei ka ban shimkhia ban pynthikna ia la u pud u sam.
Ha kane ka jingleit jurip la donlang u Syiem Pa’iem RH Wahlang, ki Myntri, ki Rangbah ka Kur Phrakpoh Pahsyntiew Wahlang, ki dkhot ka CORP Jirang Circle, ki nongialam ka Joint Action Committee Hima Jirang ki rangbah shnong bad ki paidbah.
Ka jingtih maw ha Rani Jirang ka long kaba la isherkhei namar bun ki lum ki wah ba itynnad bad jyngam ki la kylla madan plain ha shi lynter u pud naduh ka shnong Gunpaty haduh u lum Wahsieng kaba long phew kilometer.
Phi don ban ong eiei?