Lap na steshon rel Delhi, ia ki khynnah Class IV kiba jah

Shillong, 7nailar:
Ia ki ar ngut ki khynnah skul jong ka BSF Primary School, Nong-mensong kiba la jah rngai na la ing naduh ka sngi palei jong ka taiew ba la dep , la lap ha ka janmiet sngi saitjain na Old Railway Station na Delhi ha ka por 4 baje janmiet. Kitei ki ar ngut ki khynnah skul kiba la tip kyrteng kum ka Pema Sherpa bad ka Anisha S Bhagat ki dei ki khynnah kiba dang shong klad IV. U officer incharge ka Railway u la iathuh ba la lap ia ki ha Station Rel bad hadien ba kawei na ki ka la iathuh ba u kpa jong ka u trei hapoh BSF -utei u pulit u la ong ba u sa phone noh sha Controll Room ki BSF bad hadien ki sa ioh jingtip ba ka la don ka FIR ha Shillong ba la buh shaphang ka jingjah kitei ki ar ngut ki khynnah.
Kat kum ka jingiathuh utei u heh pulit, u la ong ba kitei ki khynnah ki la iathuh ha u, ba ki hiar sha Delhi da ka Avadh-Assam Express na Guwahati, bad ia mynta u la ong ba ki pulit ki dang tohkit bniah na kitei ki khynnah,bad kumba ka long mynta u la ong ba ki pulit ki dang pyndep ia kaba donkam ban eksamin ia kitei ki khynnah bad hadien kata kin sa aiti sha ki BSF lane sha ki pulit kane ka jylla. Katkum ka jingiathuh utei u pulit u la ong ruh ba kawei na ki seng treimon sngewbha na ka bynta ki khynnah ki la don ryngkat bad kitei ki khynnah.
Katkum ka jingiathuh ki heh BSF ki la ong ba kitei ar ngut ki la thmu lypa ban leit sha Punjab namarba u kpa jong kawei ka khynnah skul u la shah pynkynriah kam sha Punjab katba u kpa jong kawei pat ka khynnah u shah pynkynriah kam sha Chhattisgarh, “Ka Anisha ka ka la wan shuwa sha ing ban bujli jain hadien ka leit ia kynduh ia ka Pema shajan jaka mane blei kaba don shabar ka jaka ki BSF” u la ong.
Ula iathuh ruh ba u la ioh jingtip ba kawei na kitei ki khynnah ka la pan kylliang pisa na ki paralok jong ka ba ka donkam ban leit jingleit shabar Shillong bad u la ong ruh ba u la ioh jingtip ba ka kmier jong ka ka ju mai ju tim ia ka man ka por, u la kyntait ruh ia ka jingkynnoh ia ki shipai BSF kaba la kynnoh ba ka dei namar ka jingbym shimkhia jong ki ia ka kam, u la kren diaw ruh namar ba ki kmie jong kitei ki khynnah kim shym la pyntip ha ka por ba ki jah na iing, hynrei la pynslem ban pyntip sha ki bor ki.