Lap na krem dewiong ia ki metiap, ar ngut ki khynnah skul

Jowai,16 Jylliew:
Mynta ka sngi ki pulit ka Khliehriat ki la lap ia ka metiap ki arngut ki khynnah skul kiba la jah na la ing naduh ka 13 tarik mynta u bnai. La lap ia kitei ki arngut na kawei ka krem dewiong, kaba dap Um, ha ChapChap, hajan ka Umsali, ka surok ban iaid na ophis U DC Khliehriat sha Rymbai. Kitei ki ar ngut ki khynnah skul ba la iap, ki dei kiba la tip kyrteng kum ka Pretty Pohplet bad ka Romphin Shadap.
Lah ban pynkyn maw ba hadien ba kitei ki ar ngut ki khynnah skul jong ka Khliehriat Upper Primary School, kiba dang pule Class VI, ki la jah rngai na la ing,ki pulit ka Khliehriat ryngkat ki paidbah ha katei ka thaiñ ki la ia wad sharum shaneng bad kim shym la lap ksai satia dei tad mynta ka sngi ba ki la lap ia ka metiap. Lah ruh ban pynkynmaw ba ar sngi shuwa ban lap ia ka metiap ki pulit ki la ioh tam ia ka shithi ba kitei ki samla ki thoh ba ki pyniap ialade bad ia katei ka shithi la ioh tam na Chapchap ka jaka kaba don ha ka jingkieng Umsylli, Rymbai road.
Kitei ki ar ngut ki khynnah ki dei kiba dang don hapdeng ka rta kaba 13 haduh 14 snem, ka Pretty ka dei ka Syndai katba ka Romphin pat ka dei na Narwan.