Lap ki stad, ba kito kiba ju mlien ban thiah miet, ki iap kham kloi, ia kiba khie step

Ka jingwad khubor, kaba la pynmih ha ki khyndiat sngi ba ladep, ka iathuh ba kito ki briew, kiba thiah miet bad khie sngi, ki don ia ka jinglong mlien jongki, haba la ju tip, ba ki dei ki dkhoh peit miet bad kitei ki lah ban iap kham kloi, namar ba ki don ia katei ka jingmlien kaba sniew.

“La iathuh ruh ba kito kiba ju thiah miet, ki dei kiba ju kyrni bha ban dih kyiad bad ban dih sikret, katba kiba khie step, kim long satia kumta” ong u nongbuddien bad u nongthoh, U Christer Hublin, uba dei u stad jong ka Finnish Institute of Occupational Health ha Helsinki.

Katei ka jinglap, la pynmih paidbah ha ka Chronobiology International bad ka dei kaba la buddien ia kaei kaba la lap ha u snem 2002, da ka Finnish Twin Cohort.Kane ka jinglap, kaba mynta, ka la tohkit ia ki 24,000 ngut ki briew, hapdeng ki snem 1981 haduh u snem 2018 bad la kylli ia ki briew, kiba ju khie thiah step, kiba ju peit miet bad na kitei, la lap ba 10 percent, ki dei kiba ju peit miet bad 33 percent, kiba thiah miet bha bad sa 29percent kiba khie step bad sa 27.7 percent, kiba ju sngewtynnad ban khie step.

Na kitei, la iathuh ba ki don 8,728 ngut kiba iap noh bad haba khein, ia kiba iap, na kitei kiba la dep iakren ha ki phew snem ba ladep, ki kynthup ia kito kiba iap na ka dih kyiad, ka dih sikret, ka por thiah jongki bad haba ia bynta, la lap ba 9percent, ki kham bun kiba iap, na kaba thiah miet bha, haba ia nujor na kito kiba khie step.

U Dr Bhanu Prakash Kolla, uba pule bniah ia katei ka jinglong jingman jong ki briew, ha ka Center for Sleep Medicine ha ka Mayo Clinic in Rochester, Minnesota, u dei u bym don satia, ha katei ka jingpule, hynrei, u ong ba ka jingiapher jong ka jingiap, da 9 percent, ka dei na ka bynta kito kiba ju mlien bha ban peit miet ialade.