Tel Aviv:Ki shipai Israel, ki la lap ia ka kudam thep tyngka jong ki ehrang Hezbollah, kaba don haduh $500 million ba kynthup ia ka ksiar bad ka tyngka pliah, kaba ki la buhrieh ha ka kudam kaba don ha khrum jong ka hospital ha Beirut bad katei ka dei ka pisa, kaba la long trai da U Hassan Nasrallah, uba dei u heh duh jong ka Hezbollah.
U nongkren jong ki shipai Israel Defence Forces (IDF), u Rear Admiral Daniel Hagari, u sei da ki dur ki dar, kiba shai, ban pyni ia katei ka kudam buh pisa jong kitei ki ehrang bad u da kren shai, ba ki shipai Israel, kim kwah satia ban leit kurup ia katei ka pisa.
“Katei ka krem, ka dei kaba la tei khnang ha khrum ka hospital bad ka don haduh shiteng billion dollar ha ka jingdon ka ksiar bad ka pisa bad katei ka pisa, ka dei kaba la biang bha, ban maramot thymmai ia ka Lebanon, hynrei, la pyndap pynbiang tang ia kitei ki ehrang Hezbollah” ong U Hagari.
Ka IDF, ka kynnoh ba ki ehrang Hezbollah bad ki Hamas, ki pyndonkam ia ki hospital bad ki skul bad kiwei de ki jaka, ban rieh ialade bad ban buhrieh ia ki tiar siat jongki.
Phi don ban ong eiei?