Lap ki khynnah mareh ia ka kali Swift, kaba la ingkhong ha Mairang

Shillong: Katba ki khynnah samla ki dang ia sngewbang bad ia muja ka ia mareh step ha ka shnong Sangshong ha ka step jong ka sngi Thohdieng kata ka 22 tarik u bnai Risaw 2021 hynrei kynsan ki la lap ia kawei ka kali Maruti Swift kaba don ia u registration nombar ML 05 S 5029 kaba la ingkhong khait harud jong ka surokbah Shillong Nongstoiñ kaba don hajan ka Tirot Sing Memorial Civil Hospital ha Mairang.

Mar sien ioh jingtip halor kane ka jingjia na kitei ki khynnah, ki nongialam jong ka Shnong Sangshong ki la her bak sha katei ka jaka da kaba ki la pyntip sha ki pulit jong ka Mairang Police Station bad na ka liang ki pulit ki la poi mar mar ha katei ka jaka ban pynlong ka jingtohkit halor ka jingpluh bad ka jingkhong khait jong katei ka kali.