Lap ka SPB ba shah ktah ki nongbylla 100 sngi na ki kyndon pisa

Shillong, 20’lyngkot:
Ha ka 12 tarik u kylalyngkot ka State Planning Board Meghalaya (SPBM) ka la lap ba ki nongbylla 100 sngi ki la shah ktah jur bha na ki kyndon pisa kiba lah ban sei pisa tang T.24 hajar tyngka shi taiew. Katkum ka kyrwoh khubor na u Chairman ka SPBM u bah John F Kharshiing u la ong ba ka board ka la ioh jingtip ia katei na ki BDO, u la ong ba ha Selsella C&RD Block ki don haduh 70%ki nongbylla 100 sngi kiba don job card kim treh ban plie account bad ia ka pisa bai bylla jong ki la phah beit sha ka account ka VEC hynrei ka jingeh ba ki ia kynduh pat ka long ba ka VEC kam lah ban sei lut ia ki namar ba ia ka pisa la ju sei tang shisien shibnai.
La ong ba na katei ka jingjia bun ki nongbat job card ki la sdang artatien ban wan trei bylla namar ka jingsohsat bym ioh sei pisa bad nalor kata ka ba pynshitom shuh shuh ia ki ka dei namar ka jingjngai ki bank bad katei ka jia ha ri lum Garo namarba ki bank ki duna palat ha kitei ki thaiñ.
Sa ha ri Lum Khasi la ong ba ki paidbah kiba sah ha ki thaiñ Khat-ar shnong ki da syllang ha kaba ki hap ban leit shaduh Mawjrong, hynrei ka jingleit kaba tang shisien kam ju biang kam bad ki hap ban leit bunsien bad katei ka ktah ia ki.