New Delhi: Hynnin ka sngi, ka Supreme Court, ka la kren shai ba kan peit kyrpang halor ka jing ujor mukotduma pyrshah ia ka Citizenship Amendment Act ha Uttar Pradesh bad ka daw, ka long namar ba katei ka Jylla, ka la iaid shakhmat ban jied ia kito ki poiwir kiba don ha katei ka Jylla, khlem pat da don ia ki ain kiba thikna.
U riewsaid ba rangbah jong katei ka kashari, U Abhishek Manu Singhvi, u iathuh ia ka kashari ba lai ngut ki nongbishar, ba la khlieh da U SA Bobde, Chief Justice, ha kaba la iathuh ba ka Uttar Pradesh, ka la sdang ban iit ia kito dei ban pynrung kyrteng ha ka ain CAA bad ban pyntrei kam ruh ia ka National Population Register (NPR) bad ka jingkwah U Singhvi, ka dei ban pynsangeh shwa, haduh ba da rai ka kashari.
U Singhvi, u iathuh ba ka sorkar UP, ka la sdang ban tik ia kito kiba don jing artatien bad kane ka dei ka bym pat ju jia ha kine ki 70snem ba ladep bad ka dei ruh kaba la leh, khlem da don kino kino ki kyndon kiba biang.
La iathuh ba haduh mynta ki don palat 40lak ngut ki briew, kiba la shim ba ki dei ki nongshong shnong kiba la dep ithuh da ka sorkar Jylla, ba ki long kiba artatien ka jinglong nongshong shnong jongki bad katei ka jia, ha ki 19 tylli ki District jong ka Uttar Pradesh. “Kitei kin da duh ia ka hok thep vote jongki” ula ong bad dawa ia ka Supreme Court, ba ka dei ban shim ia ka jing bishar ba kyrkieh.
Phi don ban ong eiei?