Lap ka longkmie da u wieh, na u bilor dawai ba ioh na Hospital Nongstoin

Nongstoin, 02 Risaw:
Kawei ka longkmie, ka kong Barisha Lyng khoi, ka kmie jong I Wandashisha Lyngkhoi na ka Shnong Mawkyrwat bad kaba shong wai ha shnong Tiehsaw Nong stoin, ka la la lap ia u kynja ba long wieh hapoh jong ka dawai pynhiar, ba la ioh na ka Civil Hospital Nongstoin,  na ka bynta ba pyndih  ia ka khun kaba dang 3 snem 8 bnai, kaba la ioh na ka Civil Hospital Nongstoin hadien ba ka dang shu ioh mih na katei ka hospital ha ka jingshah sumar.
Katei ka jingjia kala jia myn ha ka 26 tarik Nailur 2015, hadien ba katei ka kmie jong I tei I khyllung, ka la dep ban pyndih ia katei ka dawai ha duh lai sien bad ha katei ka sien kaba saw ha ba thmu ban pyndih biang ia katei ka dawai ka la kyndit thret, haba ka iohi ia u tei u kynja wieh ba u la mih na poh jong u bilor dawai  ha ka shamoit.
Hadien katei ka jingjia na ka liang jong katei ka long kmie, ka la iathuh sha ki samla jong ka KSU, West bad South West Khasi Hills bad myn ha ka sngi palei jong ka taiew ki dkhot jong ka KSU, Nongstoin Circle ha ryngkat ka jingiatrei lang bad ka KSU SWKHD, hapoh ka jingialam jong u samla Davisgoldfield Wanniang President Nongstoin Circle bad u samla Forwardman Nongren President SWKHD, lem bad ki dkhot kila leit ban ia kynduh ia ki kato katne ki nongtrei bad ki doctor jong katei ka Hospital.
Ha katei ka jingiakren na ka liang jong u wei na ki Doctor na katei ka Hospital, u la ithuh ba u tei u dawai u dei na katei hi ka Hospital, bad u ba dei ruh u dawai u ba dang biang u bym shym pat la kut satia ka tarik ka jong u (Expiry Date), bad u la pynpaw ruh ba katei ka jingjia ka dei na ka jingleh torti jong ka Kompeni ba shna ia kitei ki dawai.
Haba kren ha ki nongthoh khubor na ka liang jong u samla Davisgoldfield Wanniang u la ong ba ka sorkar ka dei ban shim ia ka jingbah khlieh ia kane, hynrei ka long artatien ia ki paidbah ban dih ia ki dawai na ki hospital namar ba ha ka jaka ba kin koit kala ban poi pynban sha ka jingmynsaw.
Na ka liang jong u samla Forwardman Nongrem President KSU, SWKHD, u la pynpaw ba na ka liang jong ka KSU West bad South West ka pynremjur ia ka sorkar halor kane ka bynta, shuh shuh u la ong ruh ba ka sorkar kan phah tohkit bniah bad ban pynbna paibah ruh ia ka kaiphod kumjuh ban pynkut noh ia ka jingiateh soskular bad kitei ki kompeni.
Kitei ki nongialam jong ka West bad South West kila pynpaw ruh ba kin sa leit ruh ban ia kynduh ia ki bor ba halor ia kane ka bynta bad lada donkam ki lah ruh ban leit ia kynduh wat ia u Myntri ba dei peit ia ka koit ka khiah.