Lap ka KSU ba leh thok ka kompeni, halor ki pipe sam um JJM

Nongpoh:Hadien ba la ioh jingtip ba ka la don ka jinglehthok da kawei ka Kompani na Kolkata, kaba la tip kum ka Jindal India Limited, ka Kompani kaba pynbiang ia ki pipe sam um ha ka jingpyntreikam ia kane ka skim Jal Jeevan Mission ha Meghalaya, ki nongialam ka KSU, North Khasi Hills District, hynnin ka sngi ki la leit ban jurip ia ki Pipe kiba dang shu wan pynpoi da katei ka Kompani ha jaka buh ia ki pipe kaba don ha phyllaw ka PHE Umsning, ha kaba la lap ba kitei ki pipe kim dei satia kita ki pipe, kumba la pynmang na ka bynta ban pyntrei ia katei ka skim sam um sha ki paidbah ha ka jylla.

Kitei ki nongialam ka KSU, kaba la ialam da u Samla Lester Nongbet, Organizing Secretary ka KSU, NKHD, haba ki la leit sha katei ka jaka ba don katei ka Trok kit Pipe, ki la bat noh ia katei ka trok bad ba kim ailad shuh ban pynhap ia kitei ki pipe, hadien kata pat ki la leit ban kynduh ia u EE ka PHE Umsning, na ka bynta ban iakren halor katei ka kam, hynrei utei u EE ka PHE um shym la lah ia ka jingkitkhlieh, ha kaba u la ai jingmut ia kitei ki KSU ba kin leit kynduh ia u Chief Engineer ha Shillong, khnang ban iashai halor katei ka bynta.

Hadien ba la mih na kamra u EE ka Umsning, kitei ki KSU ki la thew ia kitei ki pipe ba dang shu pynhap na katei ka Trok, ha kaba la lap ba kitei ki Pipe ki duna ha ka jingkhia, namar uwei u GI Pipe Medium uba dei ban don ia ka jingkhia 7.38 kg, hynrei ha ka jinglap da ki KSU na ki pipe kaba la pynhap na katei ka trok, ka long ba uwei u pipe u don ia ka jingkhia kaba tang 6.05 kg, kaba mut ba uwei u pipe u duna haduh 1 kg tam.

Haba sha ki lad pathaikhubor, u Samla Ferdynald Kharkamni, President ka KSU, NKHD lem bad u u Samla Lester Nongbet, ki la ong ba ka seng kan nym shong kli kti halor katei ka kam lehthok bad bamsap da katei ka Kompani, ha kaba ki la kynnoh ruh ba halor katei ka kam lehse la donkti lang da ki heh sorkar ha ka jylla, namar lada ym dei kumta, kumno katei ka Kompani ba shabar jylla kan nud ban wan shalan da kitei ki tiar, kiba ym larkam, kiba duna jingthew bad kiba lah ban sniew kloi.

Kitei ki nongialam ka KSU, ki la ong ruh ba ka seng kan sa shimkhia bad kan sa phah jingthoh sha ka Deputy Commissioner bad ruh sha u SP ka Ri Bhoi, khnang ba kin shimkhia halor katei ka kam bamsap. Ha kajuh ruh ka por ka seng ka dawa ruh na ka bor Distirct bad na ka sorkar ba ka dei ban thung da ka Magisterial Inquiry, na ka bynta ban lap ia ki jingshisha halor katei ka kam.
Na ka liang kitei ki nongialam ka KSU ha Ri Bhoi, ki la pynpaw ruh ba lada ym ioh ia kata ka jingshai kaba thikna halor katei ka jingwanrah da kitei ki pipe um bymler kam, ka seng kam banse wat ban khang shisyndon ia katei ka Kompani ba kan wan shalan ia ki pipe ha ka jylla.